Россий правительстве председательын алмаштышыже Дмитрий Чернышенко, Юл кундем федерал округышто РФ президентын полномочный представительже Игорь Комаров, регион вуйлатыше Юрий Зайцев креативный индустрий школышто лийыныт да регионын туризм отрасльым вияҥдыме планже дене палыме лийыныт.
Д.Чернышенкон ойлымыж почеш, регион федерал программылашке чолган ушна. 2023-2024 ийлан Марий Эллан турист инфраструктурым вияҥдаш федерал бюджет 123 миллион теҥгем ойырен. Ты окса кӱшеш модульный отель-влак чоҥалтыт, национальный турист маршрут-влак ышталтыт, Йошкар-Олан турист кодшылан проект ямдылалтеш.
«Марий Эл – туризмым вияҥдаш келшен толшо регион. 2023 ийыште тышке 1 миллион еҥ толын каен. Нунылан йӧнан инфраструктурат ышталтеш. Ты шотышто, кугыжаныш программе-влакым илышыш шыҥдараш манын, республик нацпроект-влакланат эҥерта. Мутлан, 2030 ий марте турист инфраструктурым комплексно вияҥдаш виктаралтше «Юлышто – этнотуризм рӱдер» проект ышталтын. Акше – 6,4 миллиард теҥге. Тудо Юл кундем федерал округын «Волжское путешествие» окружной инициативе проектышкыже пурен. Инвестор-шамычат туризмлан вияҥаш полшаш кумылан улыт», – палемден Игорь Комаров.
«Туризм и индустрия гостеприимства» нацроект кышкарыштат регион пашам ышта. Федерал полышлан кӧра республикын номерной фондшым пойдарыме проект-влак илышыш шыҥдаралтыт. А тиде ешартыш паша вер, турист-влакым кумылаҥдыше у точко-влак, инвестор-шамычым ушаш ешартыш йӧн. «Корпорация Туризм.РФ» АО дене пырля ««ВӰДЛЭНД» турист рекреаций кластер» инвестиций проект илышыш шыҥдаралтеш. Тудын почеш Юл эҥерыште 190 номеран унагудо комплекс, тазалыкым пеҥгыдемдыме, спортивно-тазаҥдарыше, медицине рӱдер-влак нӧлталтыт», – каласен Юрий Зайцев.
Эҥер туризмым вияҥдыме йодышат каҥашалтын. Мутлан, Козьмодемьянскыште тӱрлӧ кугытан судно-влакым приниматлен кертше пассажир причалым ыштыме.
Презентаций деч вара Дмитрий Чернышенко регионыштына туротрасльым вияҥдыме стратегийым уэмдаш темлен. Пошкудо регионла гыч турист-влак утларак толышт манын, Йошкар-Ола деч ӧрдыжтыракат нунылан комплекс-влакым нӧлтымӧ пашам вияҥдаш кӱлмӧ нерген ойлен.
Креативный индустрий школышто лийме годым уна-влак калык- художественный промысел экспозицийым, республикын сувенир да гастрономий продукцийже дене палыме лийыныт. Вице-премьер тыгак регионлан Российысе сатум икте-весе дене келшыме эллаш экспортироватлаш полшышо Стратегический инициативе агентствын программышкыже ушнаш темлен.
Уна-влак тыгак Патриарший площадьыште, Изи Какшан эҥер серыште, «Господьын Иерусалимыш пурымыжо» скульптур-влак воктене лийыныт.
Марий Эл вуйлатышын администрацийжын пресс-службыжын уверже негызеш С.Носова ямдылен.
