5 мартыште Марий Эл Образований да науко министерствыште эртыше идалыкын пашажым иктешленыт да ончыкылык задаче-влакым палемденыт. Тушто республикым вуйлатыше Юрий Зайцев лийын.
«Марий Эл правительстве регионын образований системыжлан кугу тӱткышым ойыра. 2023 ийлан тудым вияҥдаш 12,1 миллиард теҥге ойыралтеш. 2022 ий дене таҥстарымаште, отрасльым финасироватлымаш 2,1 (але 21 процентлан) миллиард теҥгелан кугемын. Национальный проект-влаклан кӧра образований сферым писынрак вияҥдаш, у тунемме верлам почаш да тоштым уэмдаш йӧн уло. Россий Федераций президент Владимир Путин палемден: «национальный проект-шамыч айдемын йырже тудын илышыжым саемдаш чоҥалтыныт». Идалыкым иктешлыме почеш, Марий Эл чыла обязательствыжым жапыштыже шуктен», – увертарен республикым вуйлатыше.
Образований да науко министр Лариса Ревуцкаян палдарымыж почеш, 2-7 ияш 34 тӱжем йочалан школ деч ончычсо образованийым пуаш 100 процентлан йӧным ыштыме шотышто Россий Федераций президентын майысе кӱштымашыже-влакымат шуктымо.
Республикыштына тунемме верым капитально олмыктымо программе илышыш пурталтеш. Кызытлан 19 школым уэмдыме, лишыл кум ийыште эше 30-ым олмыкташ палемдыме.
Тӱҥ, тыгак ешартыш естественно-научный да технологий образованийым пуышо инфраструктурым вияҥдыме пашат умбакыже ышталтеш. «Кызытсе школ» федеральный проект кышкарыште 11 тӱжем ялысе йочалан 79 «Кушмо точко» тунемме рӱдерыште естественный наукылам у семын тунемаш, проект-шымлыме пашам ышташ йӧн уло. 2024 ийыште эше 26 тыгай тунемме кумдыкым почаш палемдыме. Тидын деч посна республикыште кум «Кванториум» йоча технопарк уло, 2024 ийыште эше тынарак лиеш.«Цифран тунемме кумдык» федерал проект кышкарыште кум «IT-куб» рӱдер пашам ышта.2024 ийыште ешартыш образованийын налаш 6336 верым почаш палемдыме.
Федерал кӱкшытыштӧ пилотдымо авиаций системылан разработкым ямдылыме, ыштыме да тудын дене пайдаланыме шотышто проектым илышыш пурташ йодмашым сайлан шотлымо.
«Таче республикын правительствыже регионысо туныктышо-влаклан профессионал могырым кушкаш йӧным ышта. 1 сентябрь гыч педагог-влакын оклад кугытышт 15 процентлан кугемын. Россий Федераций президентын Федеральный Погынлан посланийыштыже педагог ден наставник-влак шотышто тӱҥ аспект-влак палемдалтыныт. Элым вуйлатыше классым да группым вуйлатымылан федеральный выплатым 10 тӱжем теҥге марте кугемдымын кӱлешлыкшым палемден. Тыгак тудо 2025 ийлан бюджетник-влаклан пашадарым тӱлымӧ у модельым ямдылаш кӱштен», – каласен Юрий Зайцев.
Марий Эл вуйлатышын пресс-службыжын уверже негызеш Г. Кожевникова ямдылен
