Кызыт Марий Эл ден Нижегородский область чекыште пожар кумдык 700 гектарым айла, калык илыме вер-влаклан лӱдыкшӧ уке.
Тидын нерген Марий Элым вуйлатышын пашажым жаплан шуктышо Юрий Зайцевлан республикын пӱртӱс поянлык, экологий да йырым-йырысе средам аралыме министр Алексей Кисилев увертарен.
Посна еҥ-влак чын огыл уверым пален налде, калык коклаште пожарын утларак кугу кумдыкым авалтымыж нерген ойлат. Регионым вуйлатышын пашажым жаплан шуктышо умбакыже тыгай сӱрет ынже палдырне манын, массовый информаций средствылаште да социальный сетьлаште калыклан эреак увертарен шогаш кӱштен. Россий МЧС-ын Марий Элысе тӱҥ управленийжын начальникше Виктор Шангин палемден: республикнан чодыралаштыже ылыжше пожар-влак утларакше айдемылан кӧра лийыт.
Юрий Зайцев ушештарен: кызыт регионышто тул ваштареш кучедалме посна режим умбакыже шуйна. Тыгодым чодырашке кошташ, тулотым ылыжташ, кочкышым ямдылаш, пиротехникым кучылташ, тыгак кукшо шудым да шӱкшакым йӱлаташ чарыме.
Пӱртӱс поянлык, экологий да йырым-йырысе средам аралыме министр Алексей Киселев рашемден: ылыжме верлаште кодшо тулым йӧртат, а йӱдым эскерат. Вий ден средства ситат. Пожар ваштареш «Авиалесоохранын», Юрино лесничествын, МЧС ден Марий Элыште тул ваштарен кучедалше кугыжаныш службо пашаеҥ-влак, тыгак чодыра участке-шамычын арендаторышт да волонтер-влак кучедалыт. Чылаже 200 марте еҥым да 48 единице техникым ушымо.
Марий Эл Республикым вуйлатышын организаций да аналитике виктемжын уверже негызеш В.СМОЛЕНЦЕВ ямдылен
