Марий Элыште чодыра пожар ваштареш кучедалше станций-влакым кӱлеш технике дене пойдарыме паша «Экологий» нацпроектын «Чодырам аралымаш» регионысо проектше дене келшышын шукталтеш.
Федерал бюджет гыч тиде амал денак 38,8 миллион теҥге ойыралтын. Тудын дене кум пожарный ден 4 грузовой машинам, бензопила да юж дене пуалтарыше арвер-влакым налаш палемдыме.
Тыгак кандаш тыгай станцийым пожар ваштареш кучедалме оборудований, снаряжений да инвентарь дене пойдараш манын, республикын резерв фондшо гыч 29,2 миллион теҥге ойыралтын Ты оксаж дене кугу давлениян 19 установкым, 14 мотопомпым, 7 тӱжем метр утла пожарный «шокшым», пилотдымо чоҥештылше 11 аппаратым, 56 радиостанцийым, йӱлалтыме да шӱрымӧ материалым ден вӱдым кондештараш 100 кугу йӧнгытым налме. Тидын нерген Марий Эл вуйлатышылан республикын пӱртӱс поянлык, экологий да йырым-йырысе средам аралыме шотышто министрже Алексей Киселев ойлен.
Кодшо идалыкысе шошо-кеҥежым пожар лийын кертме лӱдыкшӧ пагытым кузе эртарыме нерген Россий МЧС-ын республикысе Тӱҥ управленийжым вуйлатыше Виктор Шагин палдарен.
2023 ийыште республикыште 1170 пожар лийын, тышеч 221 ганаже кукшо шудо йӱлен. Тул ылыжмын тӱҥ амалже семын специалист-влак айдемын титакшым ончыктат. 2023 ийыште кукшо шудым йӱлалтымылан гына пожар надзор инспектор-влак административный правам пудыртымаш дене кылдалтше 71 протоколым возеныт.
Ончычсо ийлам ончен каласаш лиеш: пожар лийын кертме лӱдыкшӧ пагыт апрельын кокымшо-кумшо декадыштыже тӱҥалеш. Эн лӱдыкшӧ – май ден август улыт.
Республикыште чодыра пожар лийын кертме кумдыкышто чылаже 98 илем верланен, тушто 100 тӱжем наре еҥ ила. Нуным пожарный станций-влак шке контрольышкышт налыныт. Кажне ийын нине илемлаште ешартыш пашамат шуктат: торым кораҥдат, тулым эркемдыше полосам ыштат.
Юрий Зайцев тений пожар лийын кертме пагытлан ямдылалтме пашам республикнан ик эн тӱҥ задачыже семын палемден. Тудын ойлымыж почеш, автопаркым уэмдымаш Марий Элыште лийын керше чодыра пожар-влакым писын шекланен шуктен йӧрташ полшышаш.
Марий Эл вуйлатышын администрацийжын пресс-службыжын уверже негызеш С. Носова ямдылен
