Марий Эл вуйлатыше Юрий Зайцев республикысе Общественный палатын пленарный заседанийжын пашашкыже ушнен.
Заседанийым тӱҥалме годым регион вуйлатыше палемден:
– Марий Элын Общественный палатыже 2009 ий годсек пашам ышта. 15 ий жапыште палате обществе ден кучем коклаште келшыше диалогым эртара, еҥ-влакын пӱсӧ да кӱлешан йодышыштым каҥаша. Ик выступленийыштыже Владимир Владимирович Путин палате лачшымак тыгаяк лийшаш манын палемден.
Республик вуйлатышын ойлымыж почеш, 2023 ийыште Марий Элысе Общественный палате регион-влак кокласе моткочак кӱлешан да кугу мероприятийым – «Диалог. Общество. Человек» гражданский форумым – эртарен. Тушко Россий Федерацийын Общественный палатыжын еҥже-влакын ушнымыштым шотыш налын, тудым федеральный кӱкшытан событийлан шотлаш лиеш.
Тыгак Юрий Зайцев палемден:
– Марий Элыште йӱклымаш кузе эртаралтме шотышто ятыр ий общественный контроль шукталтеш. Россий Федерацийын президентшым сайлыме кампаний вашеш Эскерымаш общественный штаб ышталтын. Молгунамсе семынак теният республикысе палате деч участкылашке тӱжем утла эскерышым колтымо.
Марий Элысе Общественный палатын кодшо ийысе пашаж нерген тудын председательже Герман Дементьев каласкален. Тудын мутшо почеш, палатын ик эн тӱҥ направленийже – национальный проект-влакын илышыш шыҥдаралтмыштым тергымаш, еҥ-влакын инициативыштым поддержатлымаш, сайлымаште общественный тергымашым шуктымаш, специальный военный операцийыште улшо-влаклан гуманитар, коммерческий огыл социальный организаций-влаклан увер-методике полышым пуымаш.
Заседаний мучаште Марий Эл вуйлатыше республикысе Общественный палатын еҥже-влаклан 2024 ийыште Россий Федерацийын президентшым сайлымаште йӱклымаш кузе эртыме шотышто общественный эскерымаш пашам шуктымашке надырым пыштымыштлан Россий Федерацийын Общественный палатыжын Тауштымашыжым кучыктен.
Марий Эл вуйлатышын пресс-службыжын уверже негызеш Л. Камалетдинова ямдылен
