«Тиде ош тӱняште иктат тулык огыл…»

​29 январьыште Марий Эл Республикым вуйлатыше Александр Евстифеев Медведево районышто илыше тулык да ача-ава ончымо деч посна кодшо 39 йочалан пачер сравочым кучыктен. Ынде нуно чыланат Сенькан ялыште верланыше кум пачашан у кермыч пӧртыштӧ илаш тӱҥалыт.

Нине пачерым налаш федеральный бюджет  5,5 млн. теҥгем ойырен, республикын бюджетше – 31,5 млн.теҥгем.

«2018 ийыште тулык да ача-ава ончымо деч посна кодшо 152 еҥлан пачерым налынна. Рашемденрак каласаш гын, тидлан финансированийым 69 процентлан кугемденна», – палемден регионым вуйлатыше.

А чылаже Марий Элыш тулык йоча-шамычлан илыме верым налаш федеральный бюджет гыч 40 млн. утла теҥге пурен, республикнан казнаж гыч 105,5 млн. теҥгем ойырымо. Регионын кучемже тӱҥ цель кокла гыч иктыжлан илыме верын чапле лийшашыж деч посна эше сай, йӧнан инфраструктурым шотла. Тулык йоча-влаклан чоҥышаш пӧртымат айда-йӧра шонымаш дене ойырен налме огыл: воктенак йочасад, школ, врач амбулаторий верланеныт, тораштак огыл – тӱвыра пӧрт, книгагудо. Илыме кумдыкышто пищевой да обрабатыватлыше икмыняр предприятий пашам ышта – да чыла тиде рӱдола деч улыжат кум километр коклаште.

Сравочым кучыктымо деч вара А.Евстифеев ик пачерым ончаш пурен. Моло семын тудымат кызытсе жаплан келшыше материал дене олмыктымо, сай сантехникым, электроплитам шындыме.

«Илыме вер келшыде ок керт. Чылажымат пеш сайын ыштыме. Пачер оза-влак дене пырля меат куанена. Тиде пашам умбакыжат шуена», – манын Марий Элым вуйлатыше.

Медведево район администрацийын данныйже почеш, таче илыме верым налшаш-влакын спискыштышт тулык да ача-ава ончымо деч посна кодшо 194 йоча шотлалтеш. Тиде категорийыш пурышо-шамычлан 2014 ий гыч чылаже 67 пачерым ойырымо.