Тений ондакрак мучашлыме

Марий Эл вуйлатыше Александр Евстифеев ялозанлык да кочкыш сатум министр Андрей Кондратенко дене пашаче вашлиймашым эртарен.

«Шурным поген налме тургым эртен кайыш. Ялозанлык сатум ыштен налше-влакын лектышыштым пален налме шуэш. Ынде шушаш ийысе ялозанлык пашалан ямдылалтман. Урлыкаш фонд, техникым ямдылыме нерген мутым луктына», – мо нерген мутланаш тӱҥалшашым рашемден регион вуйлатыше.

Ведомстве вуйлатыше увертарен: тений шошо ага пашам кӱчык жапыште, агротехникым да технологийым эскерен эртарен колтымо. Ынде республикыште пасу паша мучашке лишемеш.

Кугыжаныш полышым жапыштыже пуымылан кӧра республике вийлык вещества дене шотлымаште 10 тӱжем тонн минеральный ӱяҥдышым налын. Тидыже кодшо ийысе деч 10 процентлан шукырак. 2 тӱжем утла тонн кӱкшӧ репродукциян урлыкаш пырчым налме. Тидыже 2020 ий дене таҥастарымаште 24 процентлан шукырак. Но кукшо игечылан кӧра кушкыл вияҥын кертын огыл да тидыже ялозанлык культур-влакын лектышыштышт палынак шижалтын.

«Ялозанлык сатум ыштен налше-влак шурным писын шийыныт, Юл кундем федерал округышто 23 сентябрьыште эн ончыч пырчан да отызан культурым поген налыныт. Бункер нелыт дене шотлымаште 220 тӱжем тонн пырчым, але кажне гектарлан шотлымаште 16 центнерым, шийыныт . Чаманан каласыман, тидыже кодшо ийын 63 процентше гына лиеш, – каласен Андрей Кондратенко.

Ялозанлык да кочкыш сату министр ешарен: кызыт технический культур-влакым умбакыже поген налыт. Пасулаште 75 процент рапсым шийме, йытыным кӱрыт, пареҥгым да пакчасаскам поген налме тургым мучашке лишемын. 2022 ийысе шурнылан сай негызым пыштыме: кокияшым 46 тӱжем гектарыш, але кодшо ийысе деч 1 тӱжем гектарлан шукырак, ӱдымӧ. Мландым кылмаш умбакыже куралыт. Кызыт марте 101 тӱжем гектарыште кашым савырыме. Тидыже кодшо ийысе деч 27 процентлан шукырак.

Машина ден трактор паркым уэмдышашлан озанлык-влак 1 миллиард утла теҥгеаш 480 единице ялозанлык технике ден оборудованийым налыныт.

Марий Эл вуйлатыше Александр Евстифеев ялозанлык да кочкыш сату министрлан кугу тӱткышым ялозанлык производствылан кугыжаныш полышым пуымылан ойыраш темлен. Тыгай полыш умбакыжат лийшаш.