Тений республикысе тӱшка ден фермер озанлык-влак чылаже 182 тӱжем гектар кумдыкышто ялозанлык культурым поген налшаш улыт. Тидыже кодшо ийысын 137 процентше лиеш. Тидын шотыштак шудо нӧшмым 10 тӱжем гектарыште (кодшо ийысе нарак) шийман, пареҥгым 2,8 тӱжем гектар гыч лукман (2021 ийысын 112 процентше), пакчасаскам 1,7 тӱжем гектар гыч (ӱмашсын 110 процентше) поген налман. Ведомстве вуйлатыше ӱшандарен каласен: тений лектыш чаплырак лийшаш, ынде тӱҥ задача – ончен куштымым йомдарыде поген налаш.
Кызыт озанлыклаште кургым ямдылыме тургым умбакыже шуйна. Чоштыра ден нӧрӧ кургым чылаже 483 тӱжем тонным ямдылаш палемдыме. Тидыже ик условный вуй вольыклан шотлымаште 25 центнер деч шагал огыл кормовой единицым шапашлаш йӧным ышта. Кызыт марте 287 тӱжем тонным, але планын 59 процентшым, ямдылыме. Шукияш шудо нӧшмым 1 тӱжем утла гектарыште шийын налме. Чылаже 0,4 тӱжем тонным погымо. Кажне гектарлан шотлымаште кокла лектыш – 2,2 центнер. Тидыже кодшо ийысе нарак.
– Машина ден трактор паркым уэмдышашлан озанлык-влак чылаже 885 миллион теҥгеаш 219 единице техникым налыныт. Кодшо ийысе тыгаяк жапысе деч 17 процентлан шукырак. Тыге 100 гектар курал-ӱдымӧ мландылан шотлымаште куат 123 имне вий кугытыш шуын, тидыже кодшо ийысе деч куд процентлан шукырак лиеш. Ялозанлык производствылан 504 миллион теҥге кугыжаныш полышым пуымо. Тидыже роскотым петыраш веле огыл полшен, тыгак утларак тыршаш кумылаҥден.
Республикым вуйлаташын пашажым жаплан шуктышо Юрий Зайцев министрлан район администраций вуйлатыше-влак дене пырля пасу паша кузе эртымым эскерен шогаш кӱштен. Тыгак ведомстве федерал кугыжаныш увер системылан пырче ден шурным перерабатыватлыме продуктым регистрироватлыме, уверым пуымо шотышто чулымрак лийшаш.
Марий Эл Республикым вуйлатышын органзаций да аналитике виктемжын уверже негызеш В.СМОЛЕНЦЕВ ямдылен
