Марий Элыште 10 ий жапыште шуко пачеран 1000 утла пӧртым капитально олмыктеныт
Марий Эл вуйлатыше Юрий Зайцев Россий Федерацийын правительстве председательжын алмаштышыже Марат Хуснуллинын видеоконференций йӧн дене эртарыме совещанийышкыже ушнен.
Тушто нацпроект-влакым илышыш пуртымо, специальный инфраструктурный проект, шуко пачеран пӧрт-влакым капитально олмыктымо йодыш-влакым каҥашеныт.
2014 ий гыч але марте Марий Элыште шуко пачеран ик тӱжем утла пӧртым ачалыме. Тиде паша капитально ачалымаш республиканский адресный программе дене келшышын шукталтын. Ӱмаште гына шуко пачеран 71 пӧртым олмыктеныт.
Тений тыгай пашам 92 пӧртыштӧ шукташ палемдалтеш. Нунын кокла гыч 64 вереже леведышым, 25 пӧртын тӱжвал велжым, пӧртлаште улшо 120 инженер системым, 54 лифтым ачалышаш улыт.
Республик вуйлатыше палемден: шуктымо пашан качествыжым эскерыман, чылажымат график дене келшышын ыштыман.
Марий Эл вуйлатышын пресс-службыжын уверже негызеш Л. Камалетдинова ямдылен
