Марий Эл вуйлатыше Юрий Зайцев специальный военный операцийын участникше-влак да нунын ешышт дене вашлийын. Военнослужащий-шамычлан эллан ӱшанле улмыштлан, боевой задачым шуктымышт годым патырлыкым ончыктымыштлан тауштен.
– Элнам аралыше воинна-шамычын ончылнышт вуйнам савена. Тыланда кӧра республик тӱшка сеҥымашке шке надыржым пышта. Марий Эл правительстве специальный военный операцийын участникше-шамычлан, нунын ешыштлан кӱлеш полышым пуа. Ме тендан дене пырля улына, тендан дене кугешнена, сандене, тыныс илышыштат нелылык ынже лек манын, чылажымат ыштышаш улына, – манын регион вуйлатыше.
Юрий Зайцев республикыште волонтёр штаб ыштыме нерген эше ик гана ушештарен. Нуно военнослужащий-землякна-шамычлан СВО кумдыкыш шӱдӧ дене посылкым колтеныт. Тыгак «Отечествым аралыше-влак» регионал фондын полышыжо нимучашдыме. Тушко специальный военный операцийын участникше-влак, нунын ешышт тӱрлӧ йодыш дене лектын кертыт. Тыгак поро кумылым ончыктышо фондым (предприниматель, тыглай граждан-шамыч) ыштыме. Погымо окса дене чоҥымо материалым, инструментым, радиостанцийым, квадрокоптерым, тепловизорым да фронтлан моло кӱлеш оборудованийым налыт.
Вашлиймаш годым республик вуйлатыше Сергей Шучинлан ден Андрей Бусыгинлан медальым кучыктен.
С.Шучин, 2022 ий июнь тӱҥалтыште эргыжым муаш манын, шке кумылын передовойыш каен. Павел эргыже воинский долгшым шуктымыж годым специальный военный операцийыште ӱмыр лугыч лийын. Патырлыкым ончыктымыжлан колымыж деч вара тудым Мужество орден дене палемденыт. Сергей Шучин эргыжын танк батальоныштыжак пашажым шуя.
Андрей Бусыгин 2022 ийыште специальный военный операцийыш шке кумылын каен. 2023 ий январьыште нелын сусырген. Тудлан инвалидностьым пуэныт. Кызыт «Контакт» заводышто пашам ышта. Тудат Мужество орден дене наградитлалтын. Кызыт специальный военный операцийыште Андрейын ачаж ден кок тукым изаже улыт.
Юрий Зайцев «Участнику специальной военной операции на Украине» медальым тыгак изак-шоляк Иван ден Вадим Жирновмытлан кучыктен. Нуно ончыч Сирийыште, варажым СВО-што служитленыт. Иван II степенян «За заслуги перед Отечеством» медаль дене наградитлалтын.
Республик вуйлатыше специальный военный операцийын участникше-шамычын йодышыштлан вашештен.
Марий Эл вуйлатышын пресс-службыжын уверже негызеш Елена Эшкинина ямдылен
