Россий Федерацийысе шым субъектын вуйлатышышт, федерал ден регионал кучем орган-влакын представительышт видеоконференций йӧн дене эртыше заседанийыште лийыныт. Нуно тушто Россий Федерацийын 2030 ий марте да ончыкыжо 2036 ий марте жаплан вияҥме корным да кузе финансироватлымым рашемдышашлан национальный ден федерал проектлам ямдылыме йодышым каҥашеныт.
Россий президентын полышкалышыже Игорь Левитин палемден: экономике да финанс йодыш дене комиссий регион-влакын темлымашыштым шымлен лекшаш. Нине темлымашыже у нацпроектлам софинансироватлыме, Россий Федерацийысе субъект-влакын бюджет кредит шотышто парымыштын кок кумшо ужашыжым шӧрымӧ шумлык президентын кӱштымыжым шуктымо, а утаралтше оксам инфраструктур проектлам илышыш пуртышашлан инвестиций семын кучылтмо йодыш дене кылдалтыныт.
Марий Элыште «Экономике кушмаш» направлений дене предприятийлаште паша лектышым нӧлталме шотышто 11 проектым илышыш пуртымо, аныкан производство йодыш дене 25 инструкторым ямдылыме, 26 предприятий адресный полышым налын. Тыге нине предприятийлаште производство процесс шуйнымо жап 42 процентлан кӱчыкемын, продукцийым лукмаш 25, а паша лектыш 15 процентлан кушкын.
«Паша лектыш», «Изи ден кокла кугытан предпринимательстве да индивидуальный предприниматель тӱҥалтышлан полыш», «Тӱнямбал коопераций да экспорт» нацпроектлам да «Цифран экономике» нацпрограммым илышыш пуртен толмо кӱшеш тыгай лектышыш шумо.
Заседанийыште тыгак Россий Федерацийысе субъект-влаклан федерал бюджет гыч пуымо бюджет кредит шотышто парымын кок кумшо ужашыжым шӧрымӧ кӱлешан йодышым каҥашыме. Ончылгоч шотлымо почеш, республикын парымжым шӧрымӧ кугыт 2025 гыч 2028 ий марте ий еда 0,9 миллиард теҥгеш шуэш. Тиде средства шуко йочан ешлан ойырымо участкылаште иктаж-мом чоҥаш, оласе электротранспорт составым уэмдаш, тыгак инвестиций проектлан кучылталт кертеш.
Каҥашымашым иктешлыме негызеш материалым комиссий Госсовет ден Ончыкылык вияҥмаш да нацпроектла шотышто президент пеленысе советын пырля эртарыме заседанийышт вашеш ямдылышаш.
Марий Эл вуйлатышын пресс-службыжын уверже негызеш Ю. Исаков ямдылен.
