Верысе самоуправленийын кечыжлан пӧлеклалтше торжественный мероприятий Г.Константинов лӱмеш руш академический драме театрыште эртен. Марий Эл вуйлатыше Юрий Зайцев муниципальный образований-влакын администрацийыштын представительыштым пайрем дене саламлен.
«Вуйлатыме системыште улшо верысе кучем еҥ-влак деке утларак лишыл да нуным умылышо лийын, умбакыжат тыгаяк лийын кодеш. Илыш, кушто илена, тушто эрта. Те кажне уремым, кажне суртым, еҥ-влакын йодмашыштым паледа да нуным решатлымаште тыршеда. Ола, район, илем-влакын пашашт да илышышт ушнен толмо, экономикым вияҥдышашлан йӧным ыштыме да чыла социальный обязательствым шуктымо йодыш-шамычлан мутым кучеда», – каласен республикым вуйлатыше.
Россий президент Владимир Путинын кӱштымашыж почеш тений икымше гана «Шочмо эл – Российын вийже» («Малая родина – сила России») всероссийский муниципальный форум эртаралтын. Республикын делегацийже дене пырля верысе самоуправленийын еҥже-влак тушко ушненыт, а икмынярынже сулымо награде дене палемдалтыныт.
Регионысо муниципалитетын представительже-влак кокла гыч муниципальный вуйлатыше-влакын кадр резервыштышт «Мэр-влакын школышт» да «Муниципалитет-влакын цифровой университетышт» федеральный программе почеш тунемыт.
«Чыла тиде кӱкшӧ квалификациян, компетентный, калыкын илыме условийжым нӧлтымашке виктаралтше проект-влакым шыҥдарен кертше специалист-влакым ямдылаш полша. Тиде мемнан командынам вияным ышта да сеҥымашке конда. Те республикын да элын вияҥмашкышт надырым пыштеда, ыштыме кажне ошкылна мемнам ик шонымашке – граждан-влакын илышыштым эшеат саемдымашке – лишемда», – каласен Юрий Зайцев.
Торжественный церемоний годым 34 еҥ республикым вуйлатышын кидше гыч наградым налын.
Марий Эл Республикым вуйлатышын пресс-службыжын уверже негызеш Л.СЕМЕНОВА ямдылен
