Тудо 23 февральыште корныш лектын да уло эл мучко коштеш манаш лиеш. Чылаже 75 олаште лийшаш да 34 тӱжем километрым эртышаш. Поезд шке маршрутшым Кугу Сеҥымаш кече вашеш Москва оласе Белорусский вокзалыште мучашла.
9 шагат эрдене тудым Йошкар-Оласе кӱртньыгорно вокзалыште торжественно вашлийыныт: кугыжаныш кучемын еҥже, военный, силовой структурын представительже, «Юнармий» толкын радамыште шогышо ӱдыр-рвезе да олаште илыше тыглай еҥ-влак. Военный оркестр шоктен. Чылажат пеш торжественно эртен. Марий Эл правительстве председательын икымше алмаштышыже Михаил Васютин регион вуйлатыше Юрий Зайцевын саламлымашыжым лудын пуэн. Запасын сержантше Алексей Астафьевлан «Участнику специальной военной операции» медальым да боевой действийын ветеранжын удостоверенийжым кучыктен.
Тудын деч вара СВО-што ойыртемалтше военный, тушко гуманитар полышым колтен, шупшын шогышо чолга еҥ, медик-влакым палемденыт. Нунылан Россий Обороно министерствын «За помощь и милосердие» медальжым кучыктеныт. СВО-н ветеранже Григорий Кузнецоват чоныш логалше мут-влакым ойлен. Эше ик гана пеҥгыдемден: йот элласе осал вий-влак мемнан эл ваштареш вуйым нӧлтат гынат, ме садак сеҥена. Чын – мемнан велне!
Митинг годым тыгак «Юнармий» толкын радамыш Йошкар-Оласе 1-ше №-ан школын икмыняр ӱдыр-рвезыжым пуртеныт.
Тидын деч вара поездын вагонлашкыже пурен, экспозиций-влакым ончалаш йӧн лийын. Кажне вагон посна темылан пӧлеклалтын. Иктыштыже разведкыш лекше беспилотникын операторжо, весыште боевой корабльын капитанже семын шижын кертат. Кумшышто Кугу Отечественый сар годым кузе артист-влак сӧй пасуштак салтак-влакын кумылыштым нӧлтымышт нерген каласкаленыт. Ик вагонышто гын йот элласе трофейный стрелковый оружийым чумырымо. Ты тоштер поснак армийыш кайышашлык але военный корным ойырен налше рвезе-шамычлан оҥай лийшаш, очыни. Юнармийлан, тыгак военный контракт почеш службылан пӧлеклалтше вагон-шамычат лийыныт.
СВО-што кучылталтше оружийым, техникым, эсогыл кочкышым ужын кертме. Кажне вагонышто экскурсийым эртарыше рвезе-шамычшат военный форман лийыныт. Туге каласкаленыт да умылтареныт, шкенетым СВО-ш логалмыла шижат. Тушто мо ышталтме, кузе мемнан салтак-влак кредалме нерген колыштмо. Дроным уждымыжо тудымат ужын кертын. Военный ден трофейный кугу техникат ончыкталтын. Нунын воктене шогышо военный-влак чыла нерген раш каласкаленыт.
Поезд-тоштер дене кылдалтше проектын шонымашыжак тыгай – СВО кайыме зонышто военнослужащий ден медик-влакын пашашт, подвигышт дене палдараш. Тыгак Россий Армий ден Флотын историйыштым, сеҥымашыштым шарныктараш.
Поезд воктенак Обороно министерствын «Армия России» официальный брендше дене ужалыме вургемымат налаш темленыт.
С. Носова
