Тазалыкым пеҥгыдемдыме кампаний кузе эрта?

Республикыште илыше йоча-влакын тазалыкым пеҥгыдемдыме кеҥежымсе кампаний кузерак эрта? Тидын нерген Марий Элым вуйлатыше Александр Евстифеев Образований да науко министр Наталья Адамова дене паша вашлиймаште мутланен.

Тидлан амалжат уло – кеҥежымсе кампанийын икымше сменыже мучашлалтын. Тыге 181 организацийыште (тӱн шотышто школ пеленсе лагерьлаште) чылаже 13 362 икшыве пайдалын канен. Наталья Адамован мутшо почеш, ӱмаште тыгаяк жапыште 12 591 йоча тазалыкшым пеҥгыдемден.

Кызыт республикыште ола деч ӧрдыжтӧ верланыше 16 лагерь пашам ышта, тушто 3628 ӱдыр-рвезе кана. Чыла организаций реестрыш пурталтын да Роспортебнадзорын, Госпожнадзорын, МВД-н йодмашыштым шукта.

Тулыкеш кодшо икшыве-шамычын канышыштлан поснак кугу тӱткыш ойыралтеш. Тыгай радамыш пурышо 60 ӱдыр-рвезе «Орловка», «Молодость» лагерьлаште тазалыкшым пеҥгыдемда.

«Палаткан лагерь шотышто ойлаш гын, нунын кылышт мер организацийла дене пеҥгыде. Мутлан, «Опора» кокымшо ий почела «Трамплин» палаткан лагерьым организоватла. Туштыжо йочапӧртла гыч веле огыл, тыглай еш гычат ӱдыр-рвезе-влак канат. Тыгак тиде мер организаций идалык мучко  тӱрлӧ профилактике учётышто улшо икшыве-влак дене пашам ышта. Кызыт лагерьыште 72 еҥ кана. Нунын дене занятийлам психолог ден МВД-н пашаеҥже-шамыч эртарат», – каласыш Наталья Адамова.

Министрын мутшо почеш, лагерьлаште каныше-влак дене лӱдыкшыдымылык темылан ятыр мероприятий эртаралтеш.

«Тиде паша – моткоч кӱлешан, молан манаш гын шокшо игечыште вӱдыштӧ йӱштылшо-влак шукемыт. Тиде йодышым контрольышто кучыза да эше ик гана тудым сайын каҥашыза», – каласен Марий Элым вуйлатыше.

Вашлиймаште шушаш тунемме ийлан учебник да учебно-методический материал шотышто мутланымаш лийын. Министрын ойлымыж почеш, кызыт нуным налыт да кондаш ойпидышым ыштат, чыла тидлан окса жапыштыже ойыралтын.