«Лидеры России» конкурсын регионысо этапшын участникше-влаклан Марий Эл вуйлатыше Юрий Зайцев тауштымашан серышым кучыктен.
Йыргешке ӱстел сынан вашлиймаш годым тудо нунылан тауштен да ончыкыжым кугу ответственностьым йодшо паша вуча манын палемден.
Республик вуйлатыше «Лидеры России» конкурсышко ушнымо шке опытшо дене пайлалтын да участник-влаклан сеҥымашым тыланен.
– Таҥасымаш – тиде кучедалмаш, тушто сеҥыше ден сеҥалтше-влак улыт. Но регионлан те кызытак нимогай ӱчашымаш деч посна лидер улыда, – каласен Юрий Зайцев.
Марий Эл гыч тиде конкурсыш тений 235 йодмашым колтымо.
Ик тергымаш семын Марий Эл вуйлатыше деч кейс темлалтын. Тудын дене келшышын, самырык-влакым регионысо тунемме учрежденийлаште пашам ышташ да вузлаште педагогический специальность-влакым ойырен налаш ешартыш мере-влакым темлаш кӱлын. Юрий Зайцев участник-шамыч дене нуным каҥашен да тергымаш гоч чыланат сайын эртеныт манын палемден.
Палдарыме семын ойлен кодаш гын, вич сезон жапыште «Лидеры России» конкурсыш Россий ден 150 эл гыч миллион утла йодмаш пурен.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
