Таче – тунемше, эрла – салтак

Марий Элым вуйлатыше Александр Евстифеевын 28 октябрьыште эртарыме совещанийыште военно-патриотический воспитаний йодышым ончымо.  Мутланымаште правительстве член-влак, рўдолан мэржын  пашажым жаплан шуктышо  Евгений Маслов да III степенян Кутузов орденан 14-ше  ракетный  Киевско-Житомирский  дивизийын  командиржын  алмаштышыже  Мансур Сафиуллин лийыныт.

Погынышо-влакым саламлен ойлышыжла, Александр Евстифеев 2020 ийым Россий президентын Указше дене  Шарнымаш да чап  идалык  семын увертарыме  манын ушештарен.

Сандене патриотизм шўлышеш воспитатлыме паша  поснак кўлешаныш савырна. Ӱмаште Нижний Новгородышто эртыше совещанийыште призывной ийготан самырык еҥ-влакым служитлаш ямдылыме нерген пунчалым лукмо. Ты йодышым Юл кундем федеральный округыш пурышо чыла субъектыште, тидын шотыштак Марий Элыште, каҥашыман, палемден  республикым вуйлатыше.

Кок проект нерген мутланыме.  Тышеч иктыже – «Гвардеец» юнармейский  оборонно-спортивный лагерь. Тудо Нижегородский  областьыште верланен. Вес направленийже - «Патриот»  военно-патриотический  парк да самырык тукымым военный патриотизм шўлышеш шуарыме  «Авангард»  учебно-методический  рўдер. Тыштыже чыла паша лачшымак  Марий Элыште шукталтшаш.

Правительстве председательын  икымше алмаштышыже Михаил Васютинын  ойлымыж почеш, «Гвардеец» военно-патриотический  паркыште округысо  образовательный организацийлаште тунемше самырык еҥ-влакым вич кече туныкташ палемдыме. Марий Элыште  кадет класслаште да кыдалаш профобразований учрежденийлаште тунемше икымше 180 еҥым  тушко тенияк колташ кутырен келшыме.

Ме подростко-влакым, график дене келшышын, ноябрь мучашыштак колташ тўҥалына. Тиде жап марте чыла темлымашым  ямдылен шуктена да пунчалым лукташ тыланда ончаш пуэна, каласен Михаил Васютин.

«Патриот»  военно-патриотический  парк икмыняр направлений дене шуктымо пашам авалта. Тиде – выставке-влак, музей паша, боевой ямдылалтмаш дене кылдалтше  мероприятий, спортивный  таҥасымаш-влак, туныктымо да социальный паша. Тышеч южо направленийже дене паша чулымын шукталтеш, тидлан республикыште икмыняр площадкым  ыштыме. Тылеч посна «Авангард»  учебно-методический  рўдер негызеш подростко-влаклан специализироватлыме воспитательно-образовательный  комплексым почына, каласен Михаил Васютин.

Молодежный политике, спорт да туризм министрын алмаштышыже  Станислав Егошин  тыгай рўдерым «Каменная речка»  санаторий-профилакторий негызеш почаш,  тушто иканаште 120  самырык еҥым вераҥдаш да туныкташ лиеш манын.

Марий Элым вуйлатыше  ты йодышым финанс министерстве дене пырла тєрлаш темлен. Тудо тыгак «Гвардеец» военно-патриотический  паркыште,  «Патриот»  паркыште да   «Авангард»  учебно-методический  рўдерыште самырык тукымым военный патриотизм шўлышеш шуарыме  пашам  виктарен колтымым  шинча ончылно кучаш  правительстве председательын  икымше алмаштышыже Михаил Васютинлан кўштен.