Тӱшкан каҥашаш кӱлеш

Юл кундем федеральный округышто кызытсе жаплан келшыше перинатальный рӱдер Марий Элыште гына уке.

Регионым вуйлатыше Александр Евстифеевын тыршымыж дене Йошкар-Олаште «Перинатальный рӱдер» кугыжаныш бюджет тӧнежын кӱкшӧ технологиян корпусшым чоҥымо нерген пунчал республикнан илышыштыже кугу событий семын аклалтеш, вет кызытсе рӱдерыште кумдык ситыдымылан кӧра чапле кӱкшытан медицине полышым пуаш неле.

 Таче Перинатальный рӱдер 1961-1983 ийлаште чоҥымо ончычсо азам ыштыме пӧртын вич зданийыштыже верланен. Кӱкшӧ технологиян да специализироватлыме  медицине полышым чылажымат шотыш налын чоҥымо, кызытсе жаплан келшыше оборудований дене шыҥдарыме корпусышто пуаш палынак йӧнан лиеш.

Чумыржо 5,8 тӱжем квадрат метр кумдыкан кум пачашан у корпусышто азам ыштыме 8 посна палате (тидыже ӱдырамашлан азам пелашыж дене пырля ыштыме практикым илышыш пурташ полша), ӱдырамаш-влаклан 9 койкан интенсивный терапий, кызыт гына шочшо аза-шамычлан 12 кювезан реанимаций да интенсивный терапий, мӱшкыраҥмаш патологий, аза-влакым кокымшо этапыште ончен лукмо отделений-влак лийыт.

Кӱкшӧ технологиян коропусым чоҥымо пашан акшым смете почеш 1 млрд. утла теҥгеш шотлен лукмо. РФ правительствын пунчалже дене пеҥгыдемдыме Кугыжаныш але муниципальный нуждам шукташлан сатун, пашан да услугын закупкышт шотышто мер каҥашымашым эртарыме правил дене келшышын, тиде объект нерген мер каҥашымашым обязательно эртараш кӱлеш.    

Обязательный мер каҥашымаш интернет сетьыште, Единый увер системын официальный сайтшын закупко сферыштыже «Закупкын обязательный мер каҥашымашыже» разделыште, тыгак очный публичный колыштмаш шот дене кок этап дене эртаралтеш.

Каҥашымашын икымше этапше специализироватлыме разделыште да закупко нерген уверым публично колыштмаш кышкарыште эрта. Тудо закупкын планжым вераҥдыме деч вара 20 деч шагал огыл кечым авалта. Тылеч вара закупкын планышкыже пуртымо уверым каҥашыме шотышто очный публичный колыштмаш 10 кече деч шагал огыл жап эртаралтеш.

Республикысе калыкын очный публичный колыштмашыж деч вара специализироватлыме разделыш обязательный мер каҥашымашын икымше этап протоколжо вераҥдалтеш.

Кокымшо этап специализироватлыме разделыш вераҥдыме закупко нерген уверым каҥашымаш дене кылдалтеш. Тудым иктешлыме негызеш пунчал пеҥгыдемдалтеш.

Обязательный мер каҥашымашын кокымшо этапше мучашлалтмеке, разделыш каҥашымашын кокымшо этап протоколжо вераҥдалтеш.