Марий Элыште Йоча республиканский клинический больницын у инфекционный корпусшым чоҥаш тӱҥалыныт.
– Тидын нерген куанен палемдем. Кызытсе учрежденийын уда улмыж шотышто республикыште илыше-влак вуйым шийыныт, мыламат соцкыллаште возеныт. Тиде стационар 1963 ийыштак ыштыме оралтыште верлана, – возен телеграм-каналысе шке лаштыкыштыже Марий Эл вуйлатыше Юрий Зайцев.
Палемдымыж почеш, тиде объектым чоҥаш шергын шуэш, санденак у корпусым ышташ кӱлмӧ йодышым федерал кӱкшытыштӧ ик гана веле огыл нӧлталын.
– Тудым чоҥаш йӧным кычалме шотышто Федераций Советыште Марий Эл Республикын кечыже-влак эртаралтме годым Российысе парламентын кӱшыл палатыжын председательже Валентина Матвиенко, Россий Федерацийын Тазалык аралтыш министрже Михаил Мурашкон 2022 ийыште Йошкар-Олашке толмыж годым мутланенам, – палдарен Юрий Зайцев.
Тевыс, тӱҥалтыш ышталтын. Тидлан куанаш гына кодеш.
– Чоҥымо паша график дене келшышын шукталтше манын, лично эскераш тӱҥалам. Объект моткочак кӱлешан. Республикыштына илыше икшыве-влаклан медицине полышым жаплан келшыше оборудованийым кучылтын пуыман, йоча-шамыч йӧнан условийыште эмлалтшаш улыт.
Тиде йодышым решатлаш полшымыштлан Валентина Ивановналан, Михаил Альбертовичлан да Марий Эл Республик деч сенатор Константин Иосифович Косачевлан тауштем, – возен регион вуйлатыше Юрий Зайцев.
Л.Камалетдинова
