Сурокышто мемориал лиеш

Кугу Отечественный сарыште Сеҥымашлан 75 ий теммым пайремлаш ямдылалтмаш Марий Элым вуйлатышын 14 ноябрьыште эртарыме черетдыме совещанийын темышкыже уэш савырнен.

Республикыште юбилейым пайремлаш ямдылалтме да тудым эртарыме шотышто организационный комитетын тылеч ончыч эртарыме заседанийыштыже Александр Евстифеев Сурок посёлкышто черланен колышо салтак-влаклан воинский мемориалым ыштыме пашам тўҥалаш кўштен ыле.

Теҥгече ме Сурокышто мемориальный комплексым чоҥымо пашам умбакыже шуяш кўлмє нерген мутланышна. Тушто шуко ыштыме: мланде участкым ойырымо, но пашам тўналме шотышто юватылына. Тушто бетонн пашам шуктыман, а тидыжым йўштє толмо деч ончыч шукташ келшен толеш, палемден республикым вуйлатыше вашлиймаш тўҥалтышыште.

Медведево районын администрацийжым вуйлатыше Денис Окуловын ойлымыж почеш, мемориал комплексым ышташ 400 кв. метр кумдыкан площадкым палемдыме, проектно-сметный документацийым ямдылыме. Тылеч посна тиде площадке деке шуйналтше корным ышташ кўлеш. Тидлан миллион наре теҥге кўлеш лиеш.

Объектым чоҥымо пашам шуктымо график ямде. Пашам кызытак тўҥалман, фундамент теле жапыше пеҥгыдемшаш. Мартыште плитам опташ тўҥалман, тидлан гранит плита-влакым декабрьыштак ямдылаш кўлеш. Апрельыште комплексым тўзаташ тўҥалман, палемден Денис Окулов.

Негызым пыштыме дене кылдалтше пўтынь технологический процесс тўрыснек шукталтшаш, каласен республикым вуйлатыше. Тудо тыгак гранит плиташ возалтшаш лўм-влакын, моло данныйын чын улмыштлан кє мутым куча манын йодын да ты шотышто нимогай йоҥылыш лийын огеш керт манын палемден. Тудо гранит плиталаште колышо салтак-влакын лўмыштым возымо годым ончыкыжо рашемын кертше у лўм-влакым пурташ верым кодаш кўштен.

Ончыкылык мемориал кумдыкым тўзатыме нерген ойлымо годым машина-влакым шогалтыме верым ышташ да тушто асфальтым шараш темлыме. Республикым вуйлатыше мемориал комплексым волгалтарыме да видеоэскерымаш системым вераҥдыме, а шошым Курымаш тул йўлымє верым тўзатыме нерген шоналташ кўштен.

Марий Элым вуйлатыше Александр Евстифеев совещанийын пашажым вес кечын ончыкылык мемориал комплексым ыштыме верыш лектын умбакыже шуяш сєрен.

* * *

Марий Элым вуйлатыше ондак сєрымє семынак 16 ноябрьыште воинский мемориалым чоҥымо верыш миен коштын.

Совещанийыште лийше-влак колышо салтак-влакын лўмыштым курым-курымешлан шарнымашеш кодымо йодышым каҥашеныт. Тачысе кечылан Йошкар Армийын тыште черланен колышо 555 салтакшын лўмышт пале. Марий Элым вуйлатыше чыла данныйым уэш-пачаш тергаш кўштен. Правительстве председательын икымше алмаштышыже Михаил Васютин колышо салтак-влакын спискыштым «Поисковое движение России» Общероссийский мер толкынын республикысе пєлкажын советшын председательже Дмитрий Шипунов да республикын военкоматше дене кутырен келшен рашемдена манын каласен.

Республикым вуйлатыше тиде кечынак Медведево районысо Кыдал Озакъялыште тений верысе калыкын тўҥалтышыж почеш ыштыме мемориальный комплексым ончен савырнен.

Мемнан ял шотан илемна 11 ялым ушен шога. Тушеч сарыш 599 еҥ каен, 375 еҥ гына пєртылын. Мемориальный комплексыште чылаштын лўмыштым ончыктымо. Мемориалым ышташ верысе калык 300 тўжем теҥгем поген, районын администрацийже тыгыде кўм шарыман 1 километр кужытан корным ышташ полшен, каласен ТОМ-ын председательже Галина Богданова.