Волжскышто «Демографий» национальный проектын «Спорт – илышын нормыжо» регионысо проектшым илышыш пуртымо кышкарыште Спорт полатым уэмден олмыктымо паша мучашке лишемеш. 13 сентябрьыште тушто Марий Элым вуйлатышын пашажым жаплан шуктышо Юрий Зайцев лийын.
Таче кечылан спорт объект 83 процентлан ямде. Тений тудым уэмден олмыктымо пашалан 38 миллион утла теҥгем ойырымо. Тымарте кучедалме залым олмыктымо, модмо залын пырдыжше ден туврашыжым чиялтыме.
Волжск олан мэрже Рафис Шагвалеевын мутшо почеш, Спорт полатым теле марте олмыктен пытараш палемдыме. Тудо тыгак спорт команде-влакын сеҥымашышт нерген каласкален, лектын шогышо йодыш-шамыч дене палдарен.
МЦБК-ан генеральный директоржо Александр Сташкевич предприятийын футболист-влаклан полшымыжо, кучем орган-шамыч дене пырля Волжскышто спортым вияҥдымыж нерген каласкален.
«Формым ойырена. Кызыт рвезе-влак автобус дене Нижний Новгородыш кудалыт. Транспортым республикын Молодёжный политике, спорт да туризм министерствыже пуэн. Ончыч шке тӱленна гын, кызыт – кугыжаныш», – пашам кучем орган-шамыч дене пырля ыштымышт нерген ойлен А.Сташкевич.
Рвезе-влак округ да россий кӱкшытан таҥасымашлаште ятыр гана сеҥышыш лектыныт, ончыкыжымат у сеҥымашлан ӱшанат да лӱман клублаште участвоватлаш шонат.
Марий Элым вуйлатышын пашажым жаплан шуктышо спортсмен-шамычлан у деч у кӱкшытыш шуаш да шонымашлан ӱшанле лийын кодаш тыланен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
