Советский район 85 ияш лӱмгечыжым палемден

Александр Евстифеев эн ончычак Роҥго селашке миен коштын, тушто «Йӧнан городской средам ыштымаш» программе дене келшышын, Кугу Отечественный сарыште колышо воин-влаклан да локальный боевой действий-влакын участникыштлан пӧлеклалтше мемориал ышталтеш. Тудо Сеҥымашым кондышо воинын скульптурыжым да мемориальный пырдыжым авалта, туштыжо гранит плиталаште Роҥго ял шотан илемыште шочын-кушшо да Шочмо элым аралышыла колышо 501 еҥын лӱмжым возен шындыме.

Районын администрацийжым вуйлатыше Антон Трудиновын мутшо почеш, кодшо ийыште мемориалым ыштышаш кундемым тӱрлӧ вондер деч эрыктыме, колышо салтак-влакын лӱмыштым возыман шарнымаш пырдыжым да мемориал дек шуйналтше корным ыштыме. Тений тӱзатыме паша умбакыже шуйна. Тидлан «Йӧнан городской средам ыштымаш» программе дене келшышын, 1 миллион утла теҥгем ойырымо. Тылеч посна верысе инициативылан полышым пуымо программе почеш 700 тӱжем наре теҥгем ойырымо. Тиде кундемым тӱзатыме пашаш верысе калык кумылын ушнен, каласен Антон Трудинов.

Марий Элым вуйлатыше Александр Евстифеев верысе калыкын тыршымыжым кӱкшын аклен, а шуктымо пашам сайлан шотлен.

Кундемым вуйлатыше тиде кечынак районын рӱдерыштыже стадионым ыштымашке миен коштын.

Александр Евстифеев тыгак районын лӱмгечыжлан пӧлеклалтше пайрем мероприятийыште лийын, тудыжо Советский посёлкысо культур пӧртыштӧ эртен.

Районлан 85 ий темын, тиде муниципальный образованийлан пеш чапле лӱмгече да районым шочмо кундемлан шотлышо чыла еҥлан кугу пайрем, палемден республикым вуйлатыше.

Александр Евстифеев кундемым вияҥдымаште промышленник, чоҥышо, предприниматель да моло еҥ-влакын кугу надырым пыштымыштым палемден. Советский районысо ялозанлык пашаеҥ-влакат кугу сеҥымашке шуыныт, каласен республикым вуйлатыше.

«2019 ийыште производствын индексше 117 утла процентыш шуын, тиде – республикысе район-влак коклаште эн сай лектыш. Чылаже 28 тӱжем утла тонн пырчым ыштен налме, тидыже тылеч ончычсо ийысе деч 42 процентлан шукырак. Урожайым поген налме итог почеш район кокымшо ий почела сеҥышыш лекше кум район коклаш пурен», – ешарен республикым вуйлатыше.

Районышто вич нацпроект шукталтеш. Тидлан куд ий жапыште 2,7 миллиард утла теҥге ойыралтеш, каласен кундемым вуйлатыше. Нацпроект-влакым илышыш шыҥдарен толмылан кӧра талук наре жапыште райрӱдыштӧ 2 км. утла корным олмыктымо, 20 кудывечым да общественный территорийым тӱзатыме, Советский посёлкышто чот тоштемше илем гыч еҥ-влакым кусараш шуко пачеран пӧртым чоҥымо.

Республикым вуйлатыше верысе калыклан илышыште чыла сайым, поянлыкым, тыныслыкым да сӧрасен илаш, а Советский районлан вияҥаш да пеледалташ тыланен. Вараже пашаште ойыртемалтше-влаклан наградым кучыктен.

Советский районный культур пӧртыштӧ кружокым вуйлатыше Галина Щербакова «Марий Эл Республик культурын заслуженный пашаеҥже», Вечын кыдалаш общеобразовательный школын туныктышыжо Тамара Шабалина «Марий Эл Республик образованийын заслуженный пашаеҥже» почётан лӱм дене палемдалтыныт. Икмыняр еҥлан Марий Эл Правительствын Почётан грамотыжым кучыктымо. Советский муниципальный районым вуйлатыше Антон Трудиновлан Марий Эл Республикым Вуйлатышын Тауштымашыжым кучыктымо. тыгаяк Тауштымаш дене эше икмыняр еҥ палемдалтын.