|
«Ситыже да ак ынже куш…»
21.02.2020
Марий Эл
вуйлатыше Александр Евстифеев правительстве член-влак, регионысо электросеть
компанийлан представительышт дене совещанийым эртарен да сад участкылаште сезон
тӱҥалме вашеш товариществе-влаклан электровийым ситарыме йодышым тарватен.
Республикым вуйлатышын шӱдымыж почеш садовод кооператив-влакын сетьыштым инвентаризироватлыме да обслуживатлыше организацийлам рашемдыме шотышто пашам шуктымо. Кызыт садовод-влаклан электровий тариф олаште илышын гаяк. Но электросеть озанлыкым кучымылан ешарен тӱлыктымӧ амал дене ак кугурак. Санденак акым иземдышашлан да электровийым ситарен шогышашлан обслуживатлыше посна организацийым ыштыме нерген мут лектын. Но республикым вуйлатыше тореш лийын. «Садовод-влаклан икте кӱлеш – электровий ситышын толын шогыжо да тариф ынже куш. Нуно у организацийым ышташ огыл, а улшо электросеть компаний дене кылым шотыш кондаш йодыныт», - каласен Александр Евстифеев. Тудо Рӱдӧ да Юл кундем МРСК-н генеральный директоржын алмаштышыже – «Мариэнерго» филиалын директоржо Дмитрий Фёдоров деч йодын: «Те ты пашаш ушнаш ямде улыда? Садовод товариществылам, тусо электротрансформатор оборудованийлам балансыш налаш, кушто кӱлеш, олмыкташ да лишыл жап гычак садовод-влаклан электровийым ситарен шогаш, но акым ешараш огыл?» Дмитрий Фёдоров ӱшандарен: «Ты пашам виктарен колташ компанийын ресурсшо ситышаш. Ме, садовод-влакын проблемыштым умылен, электросеть объектлам обслуживатлыме пашам шке ӱмбакына налаш ямде улына». |
«Ситыже да ак ынже куш…»
