16 октябрьыште Йошкар-Оласе Воин чап монумент воктеч икымше тӱшка призывник-влкым службо эртыме верыш торжественно ужатеныт.
Чылаштлан военный вургемым, йолчиемым чиктеныт. Тыгак автобусыш шинчын ужатыме деч ончыч кажныштлан кидшагат ден сото телефоным кучыктеныт.
Ушештарена, 1 октябрь гыч 31 декабрь марте Российыште черетан шыже призыв эрта.
– Тений регионна гыч 800 наре самырык еҥ салтак радамыш шогалеш, – мане республикын военный комиссарже Кирилл Солодовник. – Службо молгунамсе семынак идалык шуйна. РФ обороно министерствын планже почеш, шукышт Рӱдӧ военный округын тӱрлӧ частьлаштыже службым эрташ тӱҥалыт. Донецк, Луганск, Херсон, Запорожск кундемлаш огыт колто. Таче 36 самырык еҥ армий радамыш шогалеш. Призывник-шамыч Касвел военный округын сухопутный войскаштыже служитлаш тӱҥалыт. Армейский опыт дене пойдаралтыт. Мӧҥгышкышт пеҥгыде капкылан, чын пӧръеҥ лийын толыт. А ача-авалан еш пиалым да чытымашым тыланем.
Саламлымашке Марий Эл правительстве вуйлатышын икымше алмаштышыже, Российысе Военно-исторический обществын регионысо пӧлкажым вуйлатыше Евгений Кузьмин ушныш:
– Пагалыме йолташ-влак, таче армий радамыш шогалыда, элнам аралаш тӱҥалыда. Тиде порыс ожнысек почетанлан шотлалтын. Республик вуйлатыше да првительстве лӱм дене чыладам шокшын саламлем, кочадан, кугезе кочадан пеҥгыде тукымжо лийза. Чыла сай лиеш, пиалан корным тыланда.
Мучашлан призывник-влакым Николай ача суапландарен.
Елена Эшкинина
