Шушаш ийыште паша ешаралтеш

26 сентябрьыште Марий Элым вуйлатыше Александр Евстифеев Правительстве пєртыштє совещанийым эртарен. Тушто «Лўдыкдышыдымє да сай качестван автомобиль корно» национальный проектым тений республикыште шуктен толмым иктешлыме.

Тыге палемдыме: 2019 ийыште чылаже 120 км кужытан 38 автомобиль корным олмыкташ палемдыме ыле. Тышеч 25 корныжым нацпроект дене келшышын, а молыжым республиканский корно фондын средстваж кўшеш уэмдаш лийме.

Кызыт чыла объектыште паша шукталтеш але мучашке шуктымо. Тачысе кечылан 90 процент объектыште кўшыл лончо асфальтым шарыме, 38 километр корным пашаш колтымо, тидыже палемдымын 42 процентше лиеш. Нацпроектым кассовый йєн дене шуктымым ончыктышо показатель 54 процентым эртен каен. Тиде – сай результат. Россий Федераций транспорт министрын икымше алмаштышыже Иннокентий Алафинов видеоконференций годым корным олмыктымо шотышто тенийсе пашам иктешлен, ме ончылно кайыше регион-влак радамыш логалынна, увертарен правительстве председательын икымше алмаштышыже Александр Сальников. Шушаш ийлаште тенийсе дене таҥастарымаште паша ий еда 30-40 процентлан ешаралтеш, палемден тудо.

Ме 2020 ийысе сезонлан ямдылалташ тўҥалынна. Шушаш ийысе планыш пуртымо 34 объект кокла гыч 17 объектшым торгыш лукмо. Нуно республиканский значениян корно сетьыште верланеныт. Кодшо 17 объектше Йошкар-Ола агломерацийыш пура. Проектно-сметный документаций декабрь марте ыштен шукталтеш. Тидыже февраль марте контрактым ыштен шукташ да торгышто сеҥышыш лекше подрядчик-влаклан вес ийысе пашалан ямдылалташ йєным пуа, увертарен правительстве председательын икымше алмаштышыже.

Совещанийыште тыгак Сеҥымаш бульварым тўзатыме йодышым тарватыме. Оласе калыклан поснак кўлешан улшо тиде кундемым Сеҥымашлан 75 ий темме идалыкыште олмыктен шуктыман. Александр Евстифеев тидлан ямдылалтме паша кузе каен шогымым увертараш правительстве председательын икымше алмаштышыж ден Йошкар-Олан мэржылан кўштен.

Александр Сальников олмыктымо паша планыш тыгак Чавайн бульварым пурташ темлен. Олан мэрже Евгений Маслов чылаже 12 тўжем квадратный метр кумдыкан 2 км наре корным олмыктен шуктена манын сєрен.