Марий Элыште пырчан да отызан кушкылым 146 тӱжем гектарыште, але пӱтынь кумдыкышто, поген налме. Тидын нерген Марий Элым вуйлатыше Юрий Зайцевлан ялозанлык да кочкыш сату министр Андрей Кондратенко каласкален.
Региональный министрын увертарымыж почеш, чумыржо 360 тӱжем тонн пырчым погымо, гектар еда 25 центнер дене шийме. Тенийысе игечым шотыш налаш гын, тидыже сай лектыш. 2022 ий дене таҥастарымаште лектыш иземын гын, тидыже посна районлаште мландыш вӱдыжгӧ шагал вочмо дене кылдалтын.
Кызыт марте пареҥгым кок тӱжем утла гектарыште, але шындымын 80 процентше гыч, лукмо. Чумыржо 50 тӱжем тонным погымо. Кажне гектарлан шотлымаште кокла лектыш – 226 центнер. Тидыже кодшо ийысе деч 9 центнерлан шукырак.
Андрей Кондратенкон мутшо почеш, телылан кургым ситышын шапашлыме, 540 тӱжем утла тонн чоштыра да нӧрӧ кургым ямдылыме. Кандаш тылзыште 110 тӱжем тонн шӧрым лӱштымӧ, тидыже кодшо ийысе тыгаяк жап дене таҥастарымаште 18 процентлан шукырак лиеш. Тыгодым кажне ушкаллан шотлымаште кокла лӱштыш 5802 килограммыш шуын. Эртыше ийысе кӱкшытым лу процентлан эртен кайыме.
Ялозанлыкыште яра кийыше мландым кучылташ тӱҥалмылын кӧрат сай кӱкшытыш шумо. Республикыштына ялозанлык кӱлешлан 768 тӱжем гектар мланде кучылталтеш, тыгодым тудо ий еда ешаралт толеш.
Марий Эл вуйлатыше ешартыш мландым кучылтмо, кугыжаныш полышым пуымо пашам умбакыже шуяш кӱлмым палемден. Вет агропромышленный комплекс регионышто ик эн тӱҥ верым налеш.
Марий Эл Республикым вуйлатышын администрацийжын информаций паша пӧлкажын уверже негызеш В.СМОЛЕНЦЕВ ямдылен
