Шукырак колташ палемдыме

2019 ийыште «АПК продукцийым экспортыш колтымаш» федерал целевой программым кузе шуктымо да 2020 ийлан план нерген Россий Федерацийын ялозанлык министрже Д.Патрушевын регион-влак дене эртарыме видеоконференцийыштыже каӧашыме. Марий Эл деч совещанийыште республикым вуйлатыше А.Евстифеев лийын.

Д.Патрушев палемден: федерал проект дене келшышын, ялозанлык сатум ӧрдыжкӧ шукырак ужалаш лийме. Тенийлан экспортым 25 миллиард долларашым палемдыме, 2025 ийлан тиде кугытым 45 миллиард долларыш шуктышаш улына. Федерал министр субъект-влакын вуйлатышыштым экспортым умбакыже шукемдышашлан ешартыш йӧн-влакым палемдаш ӱжын.

Марий Элыште 2019 ийыште экспорт кугыт 9,6 миллион долларыш шуын. Республикнан агропромышленный комплексшын сатужо лишыл да тора 25 йот эллашке колталтеш. Чумыр продукций гыч 20 процентше Узбекистаныш кая, Белоруссийыш – 18,4, Таджикистаныш – 13,5, Италийыш – 11,7 процент. Чыве шылым Китайыш колташ тӱҥалме, пивым – Украиныш, кондитер сатум – Казахстаныш.

Республикыштына ялозанлык продукцийым ӧрдыж эллашке шукырак колтымо шотышто Ялозанлык да продовольствий, Промышленность, экономически вияҥмаш да торговльо министерстве-влак ятыр пашам ыштат. Тидым палемдыман: кодшо ийын кушкыл сатум ыштен налме индекс 114,2 процентыш шуын, вольык озанлык продукцийым ыштен налме индекс – 109,2 процентыш. Чыла тӱрлӧ озанлыкыште ямдылыме ялозанлык продукций индекс шотышто Марий Эл Юл кундем федерал округышто кокымшо верыш лектын, Российыште – латкокымшыш.

Фирменный торговльо сеть сайын вияҥеш. Ты сетьыште чылаже 1323 объект уло, тышечын 908 – республик деч ӧрдыж кундемлаште.