Марий Эл вуйлатышын пашажым жаплан шуктышо Юрий Зайцев Йошкар-Олалан 438 ий теммылан пӧлеклалтше мероприятийыш ушнен.
5 августышто Э.Сапаев лӱмеш Марий кугыжаныш опер да балет театрыш туныктышо, врач, чоҥышо, бизнес пашам шуктышо да мер организацийла гыч еҥ-влак погыненыт.
Нуным саламлымыж годым Юрий Зайцев каласен:
– Рӱдолалан, мемнан олаланна, тӱзланаш тыланем. Тек тудо эше шуко-шуко курым ила да вияҥеш. Ӱшанем, тукымланна мемнан верч намыс огеш лий. Да, мутат уке, тендам, олаште илыше-влакым чылаштым, нуным, кӧ тудым чынже денак шке кидше, вуйжо, чонжо дене ышта да вияҥда, саламлем.
Тыгак республик вуйлатышын пашажым жаплан шуктышо Йошкар-Олаште илыше-влаклан у деч у кӱкшытыш шуаш да кажне ешлан пиалым тыланен.
Тылеч вара Юрий Зайцев тӱрлӧ отрасльыште тыршыше ойыртемалтше пашаеҥ-влаклан наградым да Чап грамотым кучыктен.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен