|
Шотлышо палате деч от шылте
10.02.2020
Россий президентын пеҥгыдемдыме нацпроект-влакым шуктен толмым
тергымаш тений республикын Шотлышо палатыжын ик эн тўҥ пашажлан шотлалтеш, тыге
каласен 5 февральыште Марий Элым вуйлатыше Александр Евстифеев дене вашлиймаште
региональный контрольно-шотлышо органын председательже Сергей Каргальский.
Мутланыме годым республикын Кугыжаныш шотлышо палатыжын кодшо ийысе пашажым да тений тудын ончылно шогышо тўҥ задачым каҥашыме. Шотлышо палате ўмаште 41 контрольный ден экспертно-аналитический мероприятийым эртарен, закон да кугыжаныш кучем орган-влакын моло нормативный правовой акт-влакын проектыштлан роскот обязательстве ден кугыжаныш программе-влак дене кылдалтше ужашыште 167 экспертный иктешлымашым ямдылен. Республикын кугыжаныш шотлышо палатыже «Марий Эл Телерадио» кугыжаныш автономный культур учрежденийын финанс-озанлык паша планым шуктымыжым терген. Тидын годым республиканский бюджет гыч ойыралтше субсидийым кучылтмаште экшык улмым рашемден. Тергымашын лектышыж почеш ямдылыме документ-влакым налог инспекцийыш да ФАС-ыш колтымо, титакан-влакым административный шот дене мут кучаш шогалтыме. Палате тыгак Корно фондын плановый документ, кугыжаныш программе-влакым ямдылыме, тыгай документлашке вашталтышым пуртымо, чыла тидыжым негызлыме пашан качествыжым терген. Тиде пеш кўлешан паша, молан манаш гын, нине требованийым шуктыдымаш корным ыштымаште да олмыктымаште кўрылтыш лиймашке шуктен кертеш, каласен республикын кугыжаныш шотлышо палатыжын председательже. Марий Элым вуйлатыше Александр Евстифеев контрольно-шотлышо органын тенийысе тўҥ задачыже-влак нерген умылкален. Сергей Каргальский национальный ден региональный проект-влакым шуктен толмым терген шогымаш, контрольно-надзорный да правам аралыше орган-влак дене умбакыже пеҥгыде кылым кучымаш пашаштына рўдӧ верым налыт манын ўшандарен. |
Шотлышо палате деч от шылте
