Советский районысо Ушнур кыдалаш общеобразовательный (национальный) школыш коштшо-влакын у тунемме идалыкышт тений уэмдыме да мотор класслаште тӱҥалын.
Ӱмаште Марий Элым вуйлатыше Юрий Зайцев тысе выпускник-шамычлан аттестатым кучыктымыж годым тунемме верын оралтыжым олмыкташ мутым пуэн да тудым шуктен. Кок корпусым уэмден ачалаш 65 миллион утла теҥге ойыралтын, тышеч 63 миллион нарыже – федеральный бюджет гыч. Юрий Зайцевын кӱштымашыже почеш школ пеленысе кумыдыкым тӱзаташ ик миллион теҥгем пуымо.
Шинчымаш кечын Марий Элым вуйлатыше йоча, туныктышо да ача-ава--влакым саламлаш миен.
«Таче те шукынжо образованийым налме корнын черетан этапышкыже куснеда – вес классыш вончеда. А икымше классыш толшо-шамычлан тиде – у илышыш, шинчымашым тӱняш икымше ошкыл. Тенда ӱшанле йолташ-шамыч, оҥай мероприятий да сеҥымаш-влак вучат! Корныда волгыдо лийже, йоча-влак!» – каласен тудо торжественный линейке годым.
Школ директор Валерий Галкин Юрий Зайцевлан тауштен ойлен да тыге манын: « Юрий Викторович аттестатым пуымыж годым пеҥгыдын каласен: школ у да кызытсе жаплан келшыше лийшаш. Тудо шке мутшым шуктен. Мыланна полыш пуалтын, окса ойыралтын. Таче у тунемме ийым йоча-влак шочмо мотор школыштышт тӱҥалыт».
Тудо Марий Элым вуйлатышылан марий йылме, ОБЖ, химий-биологий да моло кабинетлан кумылын ончыктен да тыгодымак тунемше-влакын сеҥымашышт нерген кугешнен каласкален. Юрий Зайцев палемден: таче Ушнур школ республикысе Образований да науко министерствын базовый национальный тунемме вержылан шотлалтеш, вет тыште йоча-влакым изинекак шочмо йылмыштлан шӱмаҥдат да келге шинчымашым пуат. А йоча-влак этнокультур предметла дене тӱрлӧ кӱкшытан олимпиадылаште сеҥымашышт дене куандарат.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
