Марий Эл тазалык аралтыш системын первичный звеножым модернизироватлыме паша шке радамже дене шукталтеш.
Программым илышыш пуртымо радам нерген Марий Элым вуйлатышын пашажым жаплан шуктышо Юрий Зайцевлан тазалык аралтыш министр Марина Панькова каласкален. Увертарымыж почеш, 31 август марте Медведево районысо Краснооктябрьский врачебный амбулаторийым чоҥен шукташ палемдыме. Тидлан 41,4 миллион теҥгем ойырымо. Амбулаторийыш мебель ден оборудованийым конден шындаш ойпидышым ыштыме.
Тылеч посна 4 поликлинике ден 1 врачебный амбулаторийым капитально олмыктат. Чумыр пашалан 80,1 миллион теҥгем ойырымо.
Транспортым ситарыме шот дене медицине организацийлашке 24 автомобильым налаш палемдыме, тидлан 21,6 миллион теҥгем колтымо.
«Калыклан сай медицине полышым пуымо паша ик эн тӱҥ задачылан шотлалтеш, сандене кажне мероприятийын жапыштыже шукталтмыжым эскерыман да средствам тичманек кучылтман», – задачым шынден Ю.Зайцев.
2022 ийыште 15 «неле» медицине оборудованийым: 10 маммографым, 2 флюорографым, 3 стационар рентгеным налаш палемдыме, ты чот гыч 13 медтехникыжым уже кондымо.
М.Панькова ӱмаште Волжский районысо Учимсола ялыште ФАП-ым чоҥымо, тушко мебель ден медицине оборудованийым налын шындыме, Волжскышто, Морко ден Шернур посёлкылаште районысо поликлинике-влакым, Азаново ден Виловат участковый больнице-шамычым да Солнечный посёлкышто врачебный амбулаторийым капитально олмыктымо нерген каласкален. Программын кышкарыштыже 33 медицине оборудованийым налын шындыме, 61 автомобильым конден пуэдыме.
Рашемдыме почеш, «Марий Эл Республикыште здравоохраненийын первичный звеножым модернизироватлымаш» регионысо программым 2021-2025 ийлаште илышыш пуртымо кышкарыште 2 миллиард утла теҥгем кучылташ палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
