Марий Элын пӱртӱс поянлык, экологий да йырым-йырысе средам аралыме министрже Алексей Киселевын мутшо почеш, Йошкар-Оласе «Интеграл» микрорайонысо атмосфер южым эскераш федеральный кугыжаныш сеть ышталтеш.
Марий Эл вуйлатышын пашажым жаплан шуктышо Юрий Зайцевын кӱштымыж почеш эртарыме совещанийыште палемдыме: республикысе Роспотребнадзор управлений тений 6 июль гыч 22 август марте атмосфер южым шымлаш 2300 пробым налын, гигиене норматив дене келшыдымашым мумо огыл.
Министр А.Киселевын ойлымыж почеш, производствыштышт мландышӱй дене олтымо коҥгам кучылтшо, йырым-йырысе средам амыртыше предприятий-влакым рашемдыме. Июль-август тылзылаште 29 шижтарымашым лукмо, тышеч коло озанлыкше тымарте палыдыме улыт, а индешыже Единый кугыжаныш реестрыш пурталтыныт. «Интеграл» микрорайон лишке промышленный зонышто пашам ыштыше предприятий-влакын реестрышт эреак уэмдлтеш. Ты кумдыкышто 60 предприятий уло гын, 29-же нерген гына реестрышке сведенийым пуртымо.
Кеҥеж кыдал гыч микрорайонышто тӱлым уремеш олтымо шым фактым пален налме. Тидын нерген Марий Элын Элкӧргӧ паша министрын обязанностьшым жаплан шуктышо Алексей Коновалов каласен.
Совещанийыште атмосфер южын могай улмыжым эскерыше федеральный кугыжаныш сетьым ышташ палемдыме. Росгидрометын территориальный базышт негызеш кызытсе жаплан келшыше оборудованиян эскерыме пост-влакым вераҥдат.
Йошкар-Ола администраций пелен штабым чумырымо, штаб ты йодыш дене кылдалтше кугыжаныш орган-влакын пашаштым виктара. Олан мэржылан южын яндарлыкшым ончыктышо мониторингым кажне кечын эртараш кӱштымӧ.
Правительстве председательын икымше алмаштышыже, совещанийым вӱдышӧ Александр Сальников законым пудыртылшо-влакым пален налмын, ситауацийым эскерен шогымын да могай паша ышталтме нерген калыклан увертарымашын кӱлешлыкышт нерген ойлен.
Марий Эл Республикым вуйлатышын организаций да аналитике вктемжын уверже негызеш Л.СЕМЕНОВА ямдылен
