Шўкшє гыч – у пачерыш

Марий Элым вуйлатыше Александр Евстифеев 18 ноябрьыште Йошкар-Ола мучко коштын савырнен. Тидын годым тудо рўдолан мэрже Евгений Маслов дене пырля «Молодёжный», «Театральный», «Электрон» да «Машиностроитель» микрорайон-влакым умбакыже вияҥдыме йодышым каҥашеныт.

Кызыт олан инфраструктурыжым вияҥдыме йодышым тўрлє федеральный ден региональный программе-влак тєрлаш полшат. Тыге 2019 ий гыч элын моло субъектше семынак Марий Элыштат Российын президентше Владимир Путинын тўҥалтышыж почеш ямдылыме «Илыме вер да оласе среда» национальный проект илышыш шыҥдаралтеш. Тылеч посна республикыште чот тоштемше да аварийныйлан шотлалтше илыме верла гыч еҥ-влак у пачерлашке чоҥымо кундемлам вияҥдыме договор дене келшышын кусаралтыт. Тиде договор почеш конкурс негызеш ойырен налме чоҥышо организаций аварийный пєрт-влакым кораҥда да олмыштышт у объект-влакым нєлта. Тиде программыш пурышашлан пєрт аварийныйлан шотлалтшаш.

Александр Евстифеев ден олан мэрже еҥ-влакым аварийный илыме вер фонд гыч у пачерлашке кусарыме пашам умбакыжат чулымын шуктен толаш кутырен келшеныт. Евгений Масловын ойлымыж почеш, пытартыш жапыште йошкаролинец-влак дене пайдалын вашлийын мутланымылан кєра, тыгай пєрт-влаклан аварийный статусым пуымо паша сайын шукталтеш.

Республикым вуйлатыше олам ончен савырныме деч вара массовый информаций средстве-влакын еҥыштлан олам умбакыже вияҥдыме план нерген каласкален.

Нацпроект-влакым шуктен толмо кышкарыште «Илыме вер» региональный проект дене келшышын, 2025 ийлан 3 миллион кв. метр илыме верым чоҥен шуктыман. Тений 1 ноябрьлан Марий Элыште 227,7 тўжем кв. метр илыме верым ыштен шуктымо. Тидын годымак 131,9 тўжем кв. метр индивидуальный илыме верым пашаш колтымо.

Тылеч посна «Илаш йєрыдымє илыме вер фондым ўшанлын шагалемден толаш йєным ыштымаш» федеральный проект дене келшышын, республикыште 10,5 тўжем кв. метр аварийный илыме верым пытараш да 724 еҥым у илыме верыш кусараш палемдалтеш.