Покро пайрем ошыгечын Йошкар-Олаште Свято-Троицкий Сергиевый лавр гыч кондымо кугун орланыше православный святой Георгий Победоносецын мощыжын ужашыжым аралыше ковчегым Благовещений кафедаральный соборышто вашлийыныт. Туштак Сеҥымаш верч всероссийский молебен эртен.
Май гыч тӱҥалын, октябрь мучаш марте руш сарзе-влакым аралыше святой семын пагалыме святыньым Российын 100 олаж еда кондештарат да тидын годым чыла вере Сеҥымаш верч молебеным эртарат. Марий Эл Республик вуйлатыше Юрий Зайцеват тушто лийын.
Марий Элын митрополитше Иоанн проповедьым лудын да толшо-влакым Пресвятой Юмым Шочыктышо Аван леведышыжлан пӧлеклалтше шушаш пайрем дене саламлен. Регион вуйлатыше молебным эртарыме амал дене палдарен.
– Ме таче святой Георгий Победоносецын мощыжын ужашыжым вашлийынына, а тудо мемнан кугыжанышын, элын ик эн тӱҥ символжылан шотлалтеш. Православный пайремым палемдыме кечын ты событийын лиймыжымат символичный манын кертына. Ме Юмым Шочыктышо Авалан, ты святойлан Российнам шалатен пытараш шонышо нацист-влак ваштареш кредалше шкенан рвезына-шамыч, Сеҥымаш верч кумалына. Таче да эрла кажне еҥ тышке толын, меман салтак-шамыч верч тидым ыштен кертеш. Калыкнан икоян улмыжо, шочмо элнам йӧратымашыже, ик еҥ семын чак шогалын, кугыжанышнам аралаш ямде улмыжо тушманым сеҥаш полшат. Таче лач Россий гына тӱнямбалне вуйым нӧлталаш тӧчышӧ фашизмым сеҥен кертеш, – каласен Юрий Зайцев.
Марий Эл Республикым вуйлатышын администрацийжын информаций паша пӧлкажын уверже негызеш С.Носова ямдылен
