|
Сеҥымашым лишемдаш полшышо-влаклан
18.02.2020
Сеҥымашлан
75 ий темме вашеш Марий Эл вуйлатыше Александр Евстифеев Медведево районышто
илыше ветеран-влаклан медальым кучыктен.
Тудын кидше гыч наградым 8 еҥ налын. Нунын коклаште Кугу Отечественный сарын участникше, фашизмын ийготыш шудымо узникше, блокадный Ленинградыште илыше да тылыште тыршыше-влак лийыныт. Тиде – районышто ветеран-влаклан кучыктымо икымше юбилейный медаль-влак. Но, республик вуйлатышын палемдымыж почеш, регионыш 5000 утла медальым конденыт, сандене шарнымаш наградым сеҥымашым лишемдаш полшышо кажне еҥлан кучыктат. Медведево районышто лиймыж годым Александр Евстифеев национальный проект-влакым илышыш пуртымо шот дене кодшо ийын тыште могай паша ышталтмым эше ик гана ушештарен: «Лӱдыкшыдымӧ да сай качестван автомобиль корно» нацпроект дене Медведево посёлкын тӱҥ - Советский – уремжым тӧрлатыме. Тений Ленин ден Гагарин уремлам шотыш кондат. Тиде пашалан 24 млн. утла теҥге ойыралтшаш. «Демографий» нацпроект дене Знаменский посёлкышто 125 веран у йочасад шке омсажым почын. Кызыт райрӱдыштӧ 320 веран дошкольный учреждений чоҥалтеш. У тунемме ий вашеш тудо пашам ышташ тӱҥалшаш. А тений Медведево посёлкысо Чехов уремыште 100 веран эше ик йочасадым, Киров уремыште 825 веран у школым, Руэмыште садикым чоҥаш тӱҥалшыш улыт. «Образований» нацпроект дене келшышын, районысо кум школышто спортзалым ачаленыт. «Тачысе илышлан келшен толшо ола кумдыкым тӱзатымаш» программе почеш 2019 ийыште ты районышто 14 кудывечым да тӱшкан пайдаланыме 10 кумдыкым шотыш конденыт. Теният тынарак ышташ палемдалтеш. Верысе калыкын тӱҥалтышыжлан полышым пуымо программе почеш Медведево посёлкышто Сеҥымаш аллейым, Юбилейный поселкышто Чап аллейым тӱзатеныт, Кыдал Озакъялыште да Ошладӱрыштӧ сарыште вуйыштым пыштыше-влаклан памятникым тӧрлатеныт, Пиясир селаште у памятникым ыштеныт. |
Сеҥымашым лишемдаш полшышо-влаклан
