11 сентябрьыште эртыше сайлымашым лийшылан да чынлан шотлымо. Марий Эл вуйлатышым сайлымаште Юрий Зайцев сеҥен.
Вӱргечын республикын ЦИК-шын эртыше заседанийыштыже председатель Ирина Татаринован палдарымыж почеш, йӱклымаш мучашлалтме жаплан избиратель-влакын спискышкышт 530019 еҥ пурталтын. Нунын кокла гыч 171842 еҥ йӱклен. Тидыже тӱрыс налмаш гыч – 32,42 %.
Эн шуко, 141666, йӱкым Юрий Зайцев поген. Антон Мирбадалев верч 13567 еҥ йӱклен. Наталия Глущенколан 9905, Валентина Злобиналан 3910 еҥ шке йӱкыштым пуэныт.
– Республикын Рӱдӧ сайлымаш комиссийже пунчалеш: Марий Эл вуйлатышым сайлымаш лийын да чынлан шотлалтеш. Марий Эл вуйлатышын должностьышкыжо регистрироватлыме кандидат Юрий Викторович Зайцевым сайлымылан шотлаш, – каласыш Ирина Татаринова.
Тыгак 19-ше №-ан Поволжскысо избирательный округышто Марий Эл Кугыжаныш Погыныш депутатым ешарен сайлымашын иктешлымашыжым официально пеҥгыдемдышт. Тушто Михаил Родионов сеҥен.
Заседанийыште палдарыме почеш, йӱклымӧ кечын республикын ЦИК-ышкыже 10 вуйшиймаш пурен. Икте – тыглай избиратель деч, молыжо – Марий Эл вуйлатышын должностьышкыжо кандидат деч. Ик ТИК-ын паша режимжым пудыртымо нерген вуйшиймаш чыныш лектын. Молыжо пеҥгыдемдалтын огытыл.
Любовь Камалетдинова
