Сай велыш вашталтышым палемден

Марий Эл вуйлатыше Александр Евстифеев РФ Эл кӧргӧ паша орган-влакын пашаеҥыштын кечыштлан пӧлеклалтше торжественный мероприятийыште лийын.

Пайрем 8 ноябрьыште Г.Константинов лӱмеш академический руш драме театрыште эртен.

Погынышо-влаклан эн ончычак республикысе эл кӧргӧ паша орган-влакын пашашт нерген каласкалыше фильмым ончыктеныт. Тылеч вара Марий Элысе МВД-н тистыжым луктыныт. Республикысе МВД министр  полицийын генерал-майоржо Сергей Волчков РФ МВД министр полиций генерал Владимир Колокольцевын саламлымашыжым лудын.

Александр Евстифеев погынышо-влакым пайрем дене саламлен да палемден: ятыр показатель шотышто сай велыш вашталтыш палдырна. Мутлан, пачерыш шолышташ шуэнрак пураш тӱҥалыныт, пудешт кертше вещества ден устройство дене шагалрак пайдаланат, преступленийым йӱшывуя ыштыше-влакын чотышт иземеш, тӱшка беспорядке ден наций, конфессий-влак коклаште умылыдымаш лекме факт лийын огыл. Тыгак тудо Инвалид-влакын III всероссийский спартакиадышт, «Бендериада-2019» юбилей фестиваль, Кугу Отечественный Сарыште сеҥымылан 74 ий теммылан пӧлеклалтше мероприятий-влак жапыште, сайлымаш годым общественный порядкым аралыме пашам кӱлеш кӱкшытыштӧ шуктымыштым палемден. Шушаш ийынат регионышто ятыр кугу мероприятий лиеш, сандене тунамат полиций пашаеҥ-влаклан шке обязанностьыштым келшен толшын шукташ кӱлмӧ нерген ойлен. «Лӱдыкшыдымӧ да сай качестван корно» нацпроектым илышыш пуртымо дене корно туткар шагалемшаш манын палемден.

Тиде пайремыштак сай пашашт дене ойыртемалтше-влаклан Марий Эл Республикын правительствыжын Чап грамотшым да Марий Эл Республик вуйлатышын Тауштымашыжым кучыктеныт.