Марий Элыште «Самырык-влаклан регион» программым илышыш пурташ 217 миллион теҥгем ойыреныт.
Молодёжь политикым вияҥдыме ты программе дене кылдалтше паша нерген республикым вуйлатыше Юрий Зайцевлан регионыштына Молодёжь политике комитетын председательже Станислав Игошин каласкален.
Лач ты программе полшымо дене кундемыштына кушкын толшо тукымлан фестиваль, форум, спорт мероприятий, тунемме стажировко эртаралтыт, тыгак у кумдык-влак почылтыт. Йошкар-Олаште Самырык-влакын полатыштым капитально олмыктымо пашан икымше йыжыҥжым эртыме, кокымшыжымат тенияк мучашлаш палемдыме. Шуко функциян рӱдерыште ӱдыр-рвезе-влакын моштымашыштым вияҥдаш у кумдыкым почмо.
«Самырык-влаклан регион» молодёжь политикым комплексно вияҥдаш виктаралтын. Тений тудын кышкарыштыже Россий кӱкшытан Самырык-влакын кечыштым, республик кӱкшытан «МолодЙошка» фестивальым, кыдалаш профессионал образованийым пуымо верлаште тунемше ден добровольчестве пашан организаторжо-влаклан Доброволец-влакын школыштым, тыгак патриотизм шӱлышан форум ден слётлам эртараш тӱҥалыт.
Программым илышыш пурташ да шке шонымашыш шуаш манын, тений мартыште Марий Эл правительстве самырык-влаклан военно-патриотический воспитанийыш пуышо «Авангард» рӱдерлан военно-патриотический корпусым ышташ Йошкар-Олаште оралтым пуэн.
Конкурсыш ушнымылан кӧра Кугу Отечественный сарыште Сеҥымашлан 80 ий теммылан регионыштына граждан-влаклан патриотизм шӱлышан воспитанйиым пуаш кӱлешан инфраструктурым ышташ палемдыме.
«Самырык-влаклан регион» конкурсышто сеҥыше-влак радамыш Марий Элна кокымшо гана лектын.
Марий Эл вуйлатышын пресс-службыж негызеш Г. Кожевникова ямдылен
