Самырык тукым – элын ончыкылыкшо

Ижевскыште РФ президентын Юл кундем федеральный округысо полпредше Игорь Комаровын вуйлатымыж почеш Округын советшын заседанийже лийын. Тушто талантан молодежьлан полшымо да йоча-влакын моштымашыштым вияҥдаш, нунылан вараже профессийым налаш да кушкаш йєным ыштен шогымо нерген мутланыме.

Марий Элым вуйлатыше Александр Евстифеев журналист-влаклан интервьюм пуымыж годым каҥашыме темын да республикысе кучемын ты корно дене шуктен толмо пашажын пеш кўлешан улмыштым палемден. Вет талантан йоча ден самырык-влак дене пашам ыштыме пайдале системым ыштымаш 2019-2024 ийлаште образованийым вияҥдыме шумлык ик эн тўҥ задачылан шотлалтеш, тидым Россий президентын «майысе» Указыштыжат рашемден ончыктымо, каласен тудо.

«Молодежьым вияҥдыме паша икмыняр корно дене шукталт кертеш. Тиде – отрасль шот дене вияҥдымаш, кызытсе производствышто специальный подразделений, кафедр-влакым ыштымаш. Мемнан тыгай примерна уло. Те паледа: ме учебный заведенийна-влакын статусыштым нєлтен толмым пеш кўлешан пашалан шотлена, вузна-влак ты задачым сайын шуктен толыт. Ончыкылык паша – тиде самырык-влаклан паша верым ситарымаш, социальный проблемылам тєрлымаш, умбакыже тунемаш, налме шинчымашым пашаште кучылташ, профессионально умбакыже кушкаш йєным ыштымаш»,- палемден Марий Элым вуйлатыше.

Республиканский СМИ-влакын еҥышт дене мутланымыж годым Александр Евстифеев тыгак самырык специалист-влакым системе почеш ямдылаш да молодежьлан талантшым да моштымашыжым ончыкташыже йєным пуышо условийым ышташ кўлмылан тўткышым ойырен.

Талантан самырык еҥ-влакым пален налме, нунылан полшымо да вияҥашышт йєным ыштыме паша у кўкшытыш нєлталтшаш. Тидлан межведомственный региональный координационный совет-влакым ышташ, тыгак сай ончыкылыкым сєрышє самырык специалист-шамыч нерген данныян банкым вўдымє пашалан мутым кучышо еҥ-влакым рашемдаш Федерацийын субьектше-влаклан темлыме.

Чыла нине корно дене шукталтше пашам РФ президентын ПФО-со полпредше эреак шинча ончылно кучаш тўҥалеш.

Совещанийыште ойлымыж годым Игорь Комаров чапле образованиян да сайын ямдылыме самырык специалист-влак Российым вияҥден толмо утларак кўлешан корнылаште ончыко шупшын наҥгайыше шкешотан локомотивыш савырнышаш улыт манын палемден.