Марий Эл вуйлатыше Юрий Зайцев специальный военный операцийын участникше-влакым Шочмо элым аралышын кечыж дене саламлен, медаль ден пӧлекым кучыктен.
Республик вуйлатыше военнослужащий-влак дене пеш кӱлешан йодышлам каҥашен, вашкерак тӧрланаш тыланен, сеҥымашлан полшымо да ӱшаныме нерген каласен.
Вара Юрий Зайцев III степень Кутузов орденан 14-ше Киевско-Житомирский ракетный дивизийыште лийын. Дивизийым командоватлыше да тушто служитлыше-влак дене вашлийын, торжественный митингыште военнослужащий-влакым Шочмо элым аралышын кечыж дене саламлен, ракетчик-влаклан кугыжаныш наградылам да квадрокоптерым кучыктен.
«Тиде кечын ме Кугу Отечественный сар ийлаште элнан эрыкшым арален кодышо да тӱням фашизм деч утарыше, сар деч вара Шочмо эллан уло шӱм-чон дене служитлыше, кугыжанышнан боевой куатшым пеҥгыдемден толшо, интернационал порысым чап дене шуктышо, терроризм ваштареш да тынысле шонымашан операцийлаште участвоватлыше-влакым саламлена. Элнам аралыше кызытсе тукым геройло кугезына-влакын сӧй чап йӱлаштым порын арала да шуен толеш, Россий Федерацийын эрыкшым да тичмашлыкшым ӱшанлын сакла, СВО фронтлаште фашизм да НАТО ушем ваштареш кредалеш», – каласен Юрий Зайцев.
Марий Эл вуйлатыше палемден: таче ракетный дивизийын вооруженийыштыже ӧрыктарыше стратегический ракете комплекс кучылталтеш, тыгайже тетла уке, тудо сӧй кӱлешлыклан эреак ямде да виктараш лийме.
Марий Эл вуйлатышын пресс-службыжын уверже негызеш Ю.Исаков ямдылен
