Регион вуйлатыше Юрий Зайцев СВО-н ветеранже-шамычлан «Участник специальной военной операции» нагрудной знакым кучыктен. Элнам аралышын кечыж деч ончыч тиде вашлиймаш поснак шарнымашан лиеш манын тудо.
– Таче ме кӱлешан событийым палемдаш погыненна. Ме лӱмынак регион кӱкшытан наградым ыштенна. Элна верч шке илышыштым чаманыде кредалше-влаклан тауштышаш улына. СВО-што лийше кажне еҥ мӧҥгыжӧ сеҥымаш дене пӧртылшаш да ты наградын озаже лийшаш, шонем. 24 февральыште Россий президент Владимир Путинын СВО тӱҥалме нерген увертарымыжлан кок ий лиеш. Палем, спецопераций кӱлешлан увертаралтын. Тачысе кечын тушман-влак мемнам тыглай ынешт колто, чын деч кораҥнешт, – палемден Юрий Зайцев.
Регионын военнослужащийже-шамычлан эреак полшаш тыршымыжымат палемден.
– Ме тылыште специальный военный операцийын участникше-влакым поддерживатлена. Боец-шамычын йодмышт почеш мо кӱлешым колтена: чоҥымо материалым, квадрокоптерым, моло оборудованийым. Военнослужащий-влакын ешыштлан полшена, – манын Ю.Зайцев.
Марий Эл вуйлатыше СВО-н ветеранже-шамычлан, нунын ешыштлан «Защитники Отечества» кугыжаныш фондын филиалжын кугу полышым пуэн шогымыжымат ӧрдыжеш коден огыл. Тудо тыгак боевой действийын ветеранже-влакын йодышыштлан вашештен, чылаштлан пеҥгыде тазалыкым, пиалым тыланен.
Марий Эл вуйлатышын пресс-службыжын уверже негызеш Елена Эшкинина ямдылен
