Эртыше кечылаште Марий Элыш Российысе триатлон федерацийын президентше Ксения Шойгу паша визит дене толын коштын.
Тудын дене Марий Эл правительстве вуйлатыше Юрий Зайцев вашлийын. Иймашым, куржталмашым да велосипед дене кудалыштмашым ушышо спортын ты видшын республикыште вияҥмыж дене кылдалтше йодыш-влакым тушто каҥашеныт. Триатлон таче регионыштына сайын вияҥеш. Тудлан мелын лийше еҥат кажне кечын шукемеш. Россий кӱкшытан таҥасымаш-шамычат мемнан дене эртат, марий спортсмен-влак сай лектышым ончыктат.
Ксения Шойгу Юрий Зайцевлан спортын ты видшым республикыште вияҥден толмылан тауштен да Россий кӱкшытан таҥасымаш-влакым эртарымаште, йоча триатлоным, тыгак регионышто ты видым кумданрак шараш полшаш сӧрен.
Вара Моско унам Бауман лицейыш намиен коштыктеныт. Тушто триатлон дисциплине дене ӱдыр-рвезе-влакым шуарыме программе дене палдареныт, зал-влакым ончыктеныт.
«Ятыр икшывын лачшымак триатлон дене кылым кучаш кумылан улмышт куандара. Кодшо ийын регионыштыда тудын дене Россий кӱкшытан ик таҥасымаш гына эртен гын, тений кумыт палемдалтын. Мый раш палем: те Российыште кокымшо школ лийыда, кушто триатлоным тунемме программыш пуртат. Эсогыл йочасадыште тудым шыҥдараш шонымаш нергенат палем», – каласен школышто лиймыж годым Ксения Сергеевна.
Тыгак тудо «Олимп» спорт полатыш миен коштын. Туштыжо триатлон пӧлка пашам ышта. Ксения Шойгу спортын ты видшым вияҥден толшо еҥ-влак дене вашлийын, туныктымо да тренироватлыме класс ден залыште лийын. Вашлиймаш годым Федерацийын тауштымашыжым Марий Элыште триатлон федерацийын президентше Наталья Шерстневалан кучыктен.
Тачысе кечылан триатлон тыгак сайын Волжск олаште да ты районышто вияҥеш. 2023 ийыште Марий Элыште ты вид дене республик кӱкшытан 9 таҥасымаш эртаралтын, тыгак эше икте – Россий кӱкшытан (дуатлон-спринт). Тышкак Россий кубокын дуатлон спринт дене 2-шо ден триатлон-спринт дене 3-шо этапыштым ончыктыман. Тенийлан 6 тыгай спорт мероприятий палемдалтын.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Ивановын палемдымыж почеш, триатлон республикыште сай кӱкшытыштӧ таҥасымаш-влакым эртараш лийше сай спорт инфраструктурым ыштымылан кӧрат вияҥеш.
Марий Эл вуйлатышын пресс-службыжын уверже негызеш С.Носова ямдылен
