Марий Эл – Российыште медицине полышын персонифицироватлыме учётшын подсистемыжым шыҥдарыме шотышто пилотный проектым илышыш пуртышо икымше регион
13 декабрьыште Марий Элым вуйлатыше Юрий Зайцев Обязательный медицине страхованийын федеральный фондшын председательже Илья Баланин дене увер шотышто пашам пырля ыштыме нерген келшыкым подписатлен.
Проектын тӱҥ шонымашыже персонифицироватлыме учётым ыштыме годым уверын чынлыкшым, тичмашлыкшым да кӱлешлыкшым лӱмын ямдылыме методологический да технологический йӧн-влак негызеш тергыме дене кылдалтын. Тидыже увер процесс-шамычын ОМС-ын Кугыжаныш увер системыжын ик технологический площадкышкыже куснымышт, данный-влак учётым утларак пайдалым ыштыме, медицине полышын качествыжым саемдыме нерген ойла.
Марий Элым вуйлатыше тазалык аралтыш аланын цифровизацийжым тӱнямбалне ик эн ончыл процесс семын палемден да Россий Минздрав ден ОМС-ын федеральный фондшылан республиклан ӱшаным ыштымыштлан тауштен.
«Тиде системе граждан-шамычлан шымлымашым эртыме, врач деке мийыме жап ден результатым эскераш йӧным ышта. Тыгак врач ден пациент кокласе кылым куштылемда. Ме проактивный медициныш куснена, да здравоохраненийын задачыже черым эмлыме дене огыл, а тазалыкым аралыме дене кылдалтеш. Тазалык аралтыш системын информатизацийже тыгак президентын калыкын илышыжым кужемдыме шотышто задачыжым илышыш пурташ полша», – палемден И.Баланин.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
