Видеоконференц йӧн дене эртаралтше совещанийыште Марий Эл вуйлатышын сомылжым жаплан шуктышо Юрий Зайцев Россий президент Владимир Путинлан республикысе чодыра пожар нерген ойлен.
Тачысе кечылан чодыра ик вере йӱла. Тул 700 гектарым «нулалын», талышнен йӱлымӧ кумдыкшо 27 гектарыш шуын. Пожарым йырым-йыр опорный (36 км) да минерализованный (70 км) каш-влак дене авырен налме да ваштареш тулым колтымо. «Авиалесохранын» бортшо да Россий МЧС ын Марий Элысе Тӱҥ управленийжын авиасистемыже кажне кечын терген чоҥештылыт.
«Лӱдыкшыш ик ялат логалын огыл. Пожар дек эн лишне – Васильевское села, 10 километр лиеш. Шикш шарлен огыл», – каласен Юрий Зайцев.
Чылаже 185 еҥым да 40 техникым ушымо, тышеч 75 еҥже да 13 техникыже Россий МЧС-ынлан шотлалтеш. Тулым йӧртымаште «Россети-Центр и Приволжье» кугун полша, кудал эртен каяш лийдыме верлаште тул ылыжмым тергаш да ешартыш вийым кондаш кӱлешан транспортым ойыра, каласен Юрий Зайцев.
Тыгак палемден: тул умбакыже ынже шарле манын, сводный группировкын вийже дене пошкудо Нижегородский областьыште озаланыше пожарым йӧрташ полшат.
Тачысе кечылан чодыра пожар эл мучко ӱмашсе дене таҥастарымаште кум пачаш шагал кумдыкым авалтен. Но пеш чот шокшо шогымылан кӧра икмыняр регионышто, мутлан, Рязань областьыште кугу пожар ылыжын, палемден президент Владимир Путин совещаний тӱҥалтыште
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
