Марий Эл Республик Кугыжаныш Погынын депутатше-влак регионын 2023 ийысе бюджетышкыже вашталтышым пуртеныт.
31 августышто Марий Элым вуйлатыше Юрий Зайцевын темлымыж почеш Кугыжаныш Погынын кумло кандашымше сессийже эртен.
Парламентарий-шамыч регионым вуйлатышын республикын 2023 ийысе да 2024-2025 ийласе бюджетышкыже темлыме вашталтышым пеҥгыдемденыт.
Документын у редакцийже дене келшышын, тений доходым 4920,9 миллион теҥгелан, роскотым 9757,1 миллион теҥгелан кугемдыме.
Доходын кугеммыже налогын да федеральный бюджет гыч пӧртылташ кӱлдымӧ оксан шукырак пурымышт дене кылдалтын. Тылеч посна республикланна исполнительный кучем орган-влакын пашам сайын ыштымыштлан 120 миллион утла теҥгем грант семын ойыреныт.
Роскотым ончалаш гын, илыме верым чоҥымо, йӱшаш вӱдым ситарыме сооружений-влакым уэмдыме да Перинатальный рӱдерым олмыктен пытарыме пашалан 350 миллион утла теҥгем целевой субсидий семын колташ палемдыме. Бюджетыш пурышо окса тыгак Козьмодемьянскыште причалым чоҥаш, корно пашалан, аварий лийын кертме лӱдыкшан пӧртыштӧ илыше еҥ-влакым келшыше пачерыш кусараш, Херсон областьысе граждан-шамычлан куснаш полшаш, пассажир транспортым уэмдаш, «Чодыра йомак» комплексын пашажым шотыш кондаш да молылат кучылталтеш.
М.ИВАНОВА
