14 ноябрьыште республикын Финанс министерствыштыже Марий Элым вуйлатышын 2022-2023 тунемме ийысе стипендиатше-влаклан дипломым торжественно кучыктымо.
Республикым вуйлатыше Юрий Зайцевын наградыжым марий вузлаште тунемше-влаклан правительстве председательын икымше алмаштышыже Михаил Васютин кучыктен. Самырык еҥ-влакын пашам ышташ да тунеммаште, мер илышышет чапле лектышыш шуаш кумылан улмыштым чот пагалыман. Тӱрлӧ сферыште мастарлыкым ончыктымышт дене республикысе студент-влак ончыкыжо профессионально кушкаш пеҥгыде негызым ямдылат, каласен тудо.
Михаил Васютин педагог-наставник-влаклан поснак тауштен ойлен да тыге палемден: самырык-влак шинчымашыштым да мастарлыкыштым шкенан кундемыште ончыктен кертышт манын, республикын правительствыже чылажымат ышта.
Марий Элым вуйлатышын лӱмым ончыктыман стипендийже профессиональный образовательный учрежденийлаште тунемше талантан студент ден аспирант-влаклан кугыжаныш велым полшен шогышашлан ышталтын. Тыгай стипендийым налшашлан кодшо тунемме ийын результатше почеш чыла оценке кокла гыч 50 процент нарыже визытан гына лийшаш. Тылеч посна самырык еҥ научный шымлымаште, республиканский, всероссийский, тӱнямбал олимпиаде ден конкурслаште сеҥымашке шушаш. Аспирант-влакым ойырен налме критерийлан авторский открытий, изобретений, научный статья, экспериментальный пашаште участвоватлымаш шотлалтыт.
Тений лӱмым ончыктыман стипендийым 59 еҥ налеш, тышеч 28 еҥже – профессиональный образовательный организацийлаште тунемше студент, вузлаште тунемше 22 студент да 9 аспирант.
Марий Элым вуйлатышын стипендийжын кугытшо кыдалаш профессиональный образованийын программыж почеш тунемше-влаклан – 1600 теҥге, вузышто бакалавриат, специалитет, магистратур программе почеш тунемшылан – 2400 теҥге, аспирантурышто научно-педегогический кадрым ямдылыме программе почеш тунемше аспирантлан – 3000 теҥге.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
