Марий Эл Республикым вуйлатыше Юрий Зайцев оперативный йодышла дене совещанийым эртарен. Тушто ола округ ден муниципальный районлаште юнармейский движенийым вияҥдыме, У ий пайремлам аварий лийын кертме лӱдыкшӧ деч посна эртарыме нерген мутланеныт.
Марий Элым вуйлатыше совещаний тӱҥалтыште 2023 ийысе пашам иктешлен ойлен. Тидын годым тудо РФ президент Владимир Путинын тӱҥалтышыж почеш ямдылыме национальный проект-влакым шуктен толмо нерген радамлын каласкален. Ме нацпроект-влакым сайын шуктен толына. «Лӱдыкшыдымӧ да сай качестван корно» проектым шуктымо шотышто моло регион-влак коклаште визымше верыште улына. Тыштыже транспорт да корно озанлык министр Александр Анатольевич Герасименкон, министерстве коллективын, правительстве председательын алмаштышыже Александр Анатольевич Сальниковын заслугышт кугу, палемден Юрий Зайцев.
Федераций Советын председательже Валентина Матвиенкон кӱштымыж почеш Марий Элым вуйлатыше Александр Герасименколан таумутым кучыктен да «Лӱдыкшыдымӧ да сай качестван корно» проектым шуктымаште тыршыше чыла еҥлан таум каласен.
Республикын молодёжный политике комитетшын председательже Станислав Игошин юнармейский движенийым вияҥден толмо паша дене палдарен.
ПФО-н субъектлаштыже общеобразовательный организацийлаште тунемше-влак коклаште юнармеец-влакын налын шогымо удельный чотышт шотышто (8,4%) Марий Эл округышто визымше верым куча да элысе эн сай 20 субъект радамыш пура. Республикыште тачысе кечылан 153 юнармейский отряд пашам ышта.
Марий Элым вуйлатыше икмыняр муниципальный районышто патриотический пашам вияҥден колташ кӱштен. Тыгак тудо Уий пайрем кечылаште калыклан илашыже йӧным ыштен шогышо да социальный сферысе системылаште аварийный ситуаций лийме годым шокшым, газым да электроэнкргийым ситарен шогышо организацийлаште, коммунальный предприятийлаште аварийный службо-влакын пашаштым виктарен колташ йӧным ышташ задачым шынден.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
