Районлаште автовокзал-влакым уэш почаш

«У автовокзал республикыште илыше-влакым куандара манын шонем. Тылеч посна, автовокзал туризмым вияҥдымаштат пеш керале, турист-влакын олам ончен коштмо жапыште турист тӱшкам шупшыктышо автобус-влакым шогалташ вер лиеш», – каласен Марий Эл вуйлатыше.

Республикысе транспорт да корно озанлык министр Александр Герасименко автовокзалын транспорт лӱдыкшыдымылыкын йодмашыжлан келшен толмыжым палемден.

«Тымарте кӱртньыгорно вокзалын ужашыжым арендыш налын пайдаланыме, тушто шыгыр лийын, кызытсе автовокзалым тудын дене нигузе от таҥастаре. Тыште кумда, у автовокзал еҥ-влакым шупшыктымо задачым шуктымаште кугун полшышаш. Минтранслан кызытак, райцентрла гыч тӱҥалын, республик мучко улшо автовокзал-влакым уэмдыме пашалан кыртмен пижман. Тиде пашам умбакыжат шуйыман, вет тудо калыкын илышыжым саемдымашке виктаралтын», –  ойлен Александр Евстифеев.

Йошкар-Оласе у автовокзал ик пачашан, 860 кв.метр кумдыкым айла. Зданийын тӱжвал тӱсшым да оформленийжым национальный сынаным ышташ пунчалме.

Автовокзал кумдыкышто толшо-кайыше автобус-влаклан шогалашышт павильонан 10 перроным ыштыме, вес элла ден олалашке, тыгак Йошкар-Ола воктене кудалыштше автобус-влаклан 40 веран посна площадкым келыштарыме. Еҥ-влакын личный транспортыштлан 26 верым ойырымо, эше утларак кӱлеш лиеш гын, ешарыме нерген ола администраций дене кутырен келшаш палемдыме.