Юл кундем кугыжаныш технологический университетыште Военный тунемме рӱдерым почыныт.
Историйыш пурышо событий дене погынышо-шамычым Марий Элым вуйлатыше Юрий Зайцев саламлен.
«Рӱдер Россий Федераций Обороно министерствын полшымыж дене почылтеш. Тидын шотышто регионын да Волгатехын вуйлатышыже-влак кугу пашам шуктеныт. Таче тыште кызытсе илышын кугу йодмашыжлан келшыше специалист-влакым ямдылаш тунемме-материальный базат, курсант-шамычлан шинчымашым пуаш поян опытан да кӱкшӧ кугыжаныш наградан офицер-влакат улыт», – палемден тудо.
Тиде тунемме ийын 108 рвезе службым занятийла деч кӱрылтде эрташ тӱҥалын. ВУЦ авиационный техникым олмыктымо да кучылтмо дене кылдалтше военно-учетный специальность почеш сержант ден салтак-влакым ямдыла.
Рӱдерын выпускникше-влак воинский званийым налыт да аттестаций деч вара шапашыште лийыт.
ВУЦ-ышто военный техникын образецше дене практический занятий ден тренировко-влак эрташ тӱҥалыт, тунемме сборышто – пасусо занятий-шамыч.
Ю.Зайцев Волгатехын 5-ше тунемме корпусыштыжо верланыше рӱдерым ончен савырнен. Тыште военный топографий, военно-политический паша класс, саргуралым аралыме пӧлем да моло кабинет-влак улыт.
«Рӱдерыште тунемаш – чап, тыгак пеш серьёзный шонымаш. Чылаландат шке военно-учетный специальностьым налаш да, шочмо эл ӱжеш гын, боевой стройыш лачымын шогалаш тыланем», – манын регионым вуйлатыше.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
