Пагалыме йолташ-влак!
2024 ийыштат мемнан дене пырля улмыланда, шочмо йылме дене лекше газетнам лудын шогымыланда кугу тау. «Марий Эл» газет коллективна дене ончыкыжымат кундемнан тачысе да эртыме корныжо, кугыжаныш кучемын пашаже, ялозанлык да социальный илыш, тӱвыра да искусство, шочмо йылме да кугезе йӱла, марий тӱня да финн-угор кумдык, сылнымут да пӱрымаш, онар тукым да патырлык, сылне пӱртӱсна нерген материалым ямдылаш тӱҥалына, поро да пайдале уверым намиен шукташ тӱҥалына. Журналист-влак республикысе районлаш, кертме семын тыгак элыштына марий-влакын тӱшкан илыме кундемлаш миена. 2024 ийыште Российым, Марий Элым политике да мер илыш могырымат ятыр событий вуча – Россий Федераций президентым, Марий Эл Кугыжаныш Погыныш депутат-влакым сайлымаш ХII Марий калык погын… Ӱшанена, чылажат чын корно дене виктаралтеш.
Кажне ий тӱҥалтыште чыланат порым, сай велыш вашталтышым вучена. «Марий Эл» газет редакцийыштына тиде у ий гыч шижалтеш. Ме у организаций кышкарыште улына.
Марий Эл вуйлатыше Юрий Зайцевын темлымыж почеш медиахолдинг –«Марий Эл» увер агентстве» кугыжаныш автоном учреждений - ышталтын. Келшыше пунчалым Марий Эл Правительстве 2023 ий шыжым луктын ыле.
10 январьыште Марий Эл правительстве председательын алмаштышыже - тӱвыра, савыктыш да калык-влакын пашашт шотышто министр Константин Иванов у организацийын коллективше дене вашлийын.
Константин Анатольевичын палемдымыж почеш, республикысе изданий-влакым ик организацийыш ушаш шонымаш икмыняр ий ончычак шочын, но ты ошкылым шонен, вискален ышташ кӱлын. Тиде жап толын шуын, у структур утларак куат дене ышташ тӱҥалеш. Тудо тыгак у тунемме ий гыч Тӱшка увер йӧнлан (СМИ) специалист-влакым школ гычак ямдылаш тӱҥалына манын каласен. Тыге Бауман лицейыш республикысе школла гыч кугурак класслаш тунемше-влакым погаш тӱҥалыт, ончыкыжым нуно вузыш ты направлений денак тунемаш пурен кертыт.
К.Иванов коллектив ончылно Увер агентствыште улшо вуйлатыше-влак дене палдарен. Директорлан тылеч ончыч «Марийская правда» газетын тӱҥ редакторжылан ыштыше Евгений Кузнецовым, директорын икымше алмаштышыжлан але марте «Марий Эл» газетын тӱҥ редакторжылан ыштыше Александр Абдуловым, алмаштышылан Марина Ласточкинам шогалтеныт.
Ты кече гычак «Марий Эл» газетын тӱҥ редакторжылан Светлана Пехметовам, «Марийская правда» газетын тӱҥ редакторжылан Наталья Балахонцевам, сетевой изданийжын тӱҥ редакторжылан Анастасия Петровам пеҥгыдемденыт. Тыгак Марий книга савыктыш директорлан Эдуард Иманаевым шогалтеныт.
Увер агентстве директор Евгений Кузнецов рашемдымыж почеш, чыла редакцийжат – «Марийская правда», «Марий Эл», «Кугарня», «Наш город Волжск», «Молодежная жизнь в Марий Эл», «Сурт-пече» да «Ямде лий» – ончычсо семынак усталык шотышто шкевуя пашам шукташ тӱҥалыт. Тидын годымак газетым верстатлыме, шаркалыме, рекламе службо-влак икчумыр лийыт, тыгак административно-управленческий персонал ушалтеш. Тылеч посна медиахолдингыш шке полиграфий куатше дене «Периодика Марий Эл» издательствым пуртымо. Увер агентствыште чылаже 86 пашаеҥ.
Пашана кӱжгӱ. Мыланем ӱшаным ыштыше вуйлатыше-влак, йӧратыме коллектив да шочмо калык дене пырля ыштыме пашана умбакыжат тӱвыргӧ лийже.
Светлана Пехметова, «Марий Эл» газетын тӱҥ редакторжо
