|
Пырля ыштыме пашан саскаже куандара
17.04.2014
Марий Эл Республикым вуйлатыше Л.Маркелов «Россий Сбербанк» ОАО правлений председательын икымше алмаштышыже М.Полетаевын вуйлатыме делегаций дене вашлийын. Нуно ятыр йодышым каҥашеныт. Мутлан, республикыште Единый расчет рӱдерым ыштыме але банк секторын республикысе кучем орган дене пырля банк пашалан вузышто туныктымым вияҥден колтымо йодышым. Тыгак социально-экономический сферыште финанс да кредит шотышто пырля пашам ыштымымат каҥашеныт.
Марий Эл Республикым вуйлатыше Л.Маркелов Россий Сбербанкын республикын правительствыжын стратегический партнержо улмым палемден.
- Кундемыштына кӱлешан социально-экономический задачым илышыш шыҥдарымаште кредит организаций-влак коклаште Сбербанк эн ончыч пырля пашам ышташ ямде улмыж нерген шижтара. Банкын оксаже дене Юл кундемыште веле огыл, Российыштат ик эн кугу агропромышленный проект да тӱрлӧ программе-влак Марий Элыште илышыш шыҥдаралтыт. Но эн тӱҥжӧ – Сбербанк оксам ойырымо дене гына серлагыше кредит институт веле огыл, а мемнан предпринимательна-влаклан проектышыштым мучаш марте шукташ полшышо профессионал-влак команде, – манын республикым вуйлатыше Л.Маркелов ваш келшен пашам ыштымыштлан банк вуйлатыше-влаклан таум ыштымыж годым.
М.Полетаеват вашлиймашым сай могырым аклен да Марий Элын шукертсе да ӱшанле партнер улмыжым палемден.
- Мутат уке, ме тӱҥалме проект-влакым умбакыже шуена. Тыгак ончыкылан задачым палемдена. Марий Эл Республикыште Единый расчет рӱдер нунын кокла гыч иктыже лиеш, - манын тудо.
Журналист-влаклан М.Полетаев республикнан пален керташ лийдымын вашталтмыже да моторлыкшо дене ӧрыктарымыж нерген ойлен.
Марий Эл Республик Вуйлатышын мер кыл ден увер виктемже
Кусарымаш - Е.Садовин (газет "Марий Эл")
|
Пырля ыштыме пашан саскаже куандара
